मेसीको जादु चल्यो, अन्तिम क्षणमा इंग्ल्यान्डलाई हराउँदै अर्जेन्टिना विश्वकप फाइनलमा

काठमाडौं, असार ३२ — साबिक विजेता अर्जेन्टिनाले फिफा विश्वकप २०२६ को फाइनलमा स्थान बनाएको छ। बिहीबार बिहान अमेरिकाको अटलान्टास्थित स्टेडियममा भएको रोमाञ्चक दोस्रो सेमिफाइनलमा इंग्ल्यान्डलाई २–१ गोलले पराजित गर्दै अर्जेन्टिनाले उपाधि भिडन्तमा स्पेनसँगको भेट पक्का गरेको हो।
खेलको पहिलो हाफ गोलरहित बराबरीमा सकिएको थियो। दोस्रो हाफको ५५औँ मिनेटमा मोर्गन रोजर्सको क्रसमा एन्थोनी गोर्डनले गोल गर्दै इंग्ल्यान्डलाई अग्रता दिलाएका थिए।
एक गोलले पछि परेको अवस्थामा अर्जेन्टिनाले लगातार दबाब सिर्जना गर्‍यो। खेलको ८५औँ मिनेटमा कप्तान लियोनेल मेसीको पासलाई एन्जो फर्नान्डेजले उत्कृष्ट प्रहारमार्फत गोलमा परिणत गर्दै खेल १–१ को बराबरीमा ल्याए।
खेल अतिरिक्त समयमा जाने संकेत देखिइरहेका बेला इन्जुरी समयको दोस्रो मिनेट (९०+२) मा फेरि मेसीकै पासमा वैकल्पिक खेलाडी लाउटारो मार्टिनेजले निर्णायक गोल गरेपछि अर्जेन्टिनाले २–१ को सनसनीपूर्ण जित निकाल्यो।
यो जितसँगै अर्जेन्टिना विश्वकप इतिहासमा सातौँ पटक फाइनलमा पुगेको छ। यता, ६० वर्षपछि विश्वकप फाइनल पुग्ने इंग्ल्यान्डको सपना अन्तिम क्षणमा चकनाचुर भयो।
मेसीको नयाँ कीर्तिमान
३९ वर्ष २१ दिनका लियोनेल मेसी विश्वकप सेमिफाइनल खेल्ने इतिहासकै सबैभन्दा पाका खेलाडी बने। उनले सन् १९५८ मा फ्रिट्ज वाल्टर र गुनार ग्रेनले बनाएको ३७ वर्ष २३६ दिनको कीर्तिमान तोडे। खेलमा दुई असिस्ट गरेका मेसी ‘प्लेयर अफ द म्याच’ पनि घोषित भए।
केनको पनि ऐतिहासिक उपलब्धि
इंग्ल्यान्डका कप्तान ह्यारी केनले आफ्नो देशका लागि १२१औँ अन्तर्राष्ट्रिय खेल खेल्दै इंग्ल्यान्डको इतिहासमा सबैभन्दा धेरै अन्तर्राष्ट्रिय खेल खेल्ने आउटफिल्ड खेलाडीको कीर्तिमान कायम गरे।
फाइनलमा स्पेनसँग प्रतिस्पर्धा
अब विश्व फुटबलको नयाँ च्याम्पियन तय हुने उपाधि भिडन्त आगामी आइतबार अमेरिकाको न्युयोर्क–न्यु जर्सीस्थित मेटलाइफ स्टेडियममा हुनेछ, जहाँ अर्जेन्टिनाले स्पेनको सामना गर्नेछ।