इरानमाथि दबाब बढाउँदै अमेरिका, १४ व्यक्ति र कम्पनीमाथि नयाँ प्रतिबन्ध

काठमाडौं, ९ वैशाख — संयुक्त राज्य अमेरिकाले इरानमाथि दबाब बढाउने उद्देश्यसहित १४ व्यक्ति र कम्पनीमाथि प्रतिबन्ध घोषणा गरेको छ। अमेरिकी अर्थ मन्त्रालयले यी व्यक्ति तथा संस्थाहरू इरानका लागि हतियार तथा त्यसका पार्ट–पुर्जा खरिद र आपूर्ति सञ्जालमा संलग्न रहेको आरोप लगाएको जनाएको छ।
प्रतिबन्धको दायरा टर्की र संयुक्त अरब इमिरेट्ससम्म फैलिएको छ, जहाँबाट इरानसँग जोडिएका कारोबारी गतिविधि सञ्चालन भइरहेको अमेरिकी दाबी छ।
यो कदम डोनाल्ड ट्रम्प प्रशासनले इरानसँग सम्बन्धित सुरक्षा र सैन्य गतिविधिमाथि नियन्त्रण कडा पार्ने रणनीतिअन्तर्गत आएको हो। विशेषगरी युद्धविराम सम्बन्धी घोषणाअघि गरिएको यो निर्णयले इरानी शासनमाथि आर्थिक तथा कूटनीतिक दबाब कायम राख्ने संकेत दिएको छ।
अमेरिकी पक्षका अनुसार, प्रतिबन्ध सूचीमा परेका व्यक्ति र कम्पनीहरूको सम्पत्ति यदि अमेरिका वा अमेरिकी नागरिकसँग सम्बन्धित क्षेत्रमा भेटिएमा तुरुन्तै रोक्का गरिनेछ। यसले अन्तर्राष्ट्रिय वित्तीय प्रणालीमार्फत हुने सम्भावित कारोबारमा समेत असर पार्ने अपेक्षा गरिएको छ।
पछिल्लो कदमले अमेरिका–इरान सम्बन्ध झन् चिसिन सक्ने विश्लेषण गरिएको छ, साथै मध्यपूर्व क्षेत्रमा शक्ति सन्तुलनमा पनि यसको प्रभाव देखिन सक्ने अनुमान गरिएको छ।