भोटेकोशीसहितका नदीमा आएको विनाशकारी बाढीपछि बेपत्ता भएकाहरूको खोजी, घाइतेको उद्धार तथा प्रभावित क्षेत्रमा राहत वितरणको काम शुक्रबार पनि जारी छ। बाढीका कारण हालसम्म मृत्यु हुनेको संख्या ४६९ पुगेको प्रहरीले जनाएको छ।
नेपाल प्रहरी, सशस्त्र प्रहरी बल, नेपाली सेना तथा स्थानीयको सहभागितामा विभिन्न जिल्लामा खोजी तथा उद्धार अभियान सञ्चालन भइरहेको छ। बाढी प्रभावित क्षेत्रमा उद्धार, राहत र खोजीका लागि नेपाल प्रहरीका मात्रै ४ हजार ३४८ जना परिचालन गरिएको छ।
प्रहरीका अनुसार फेला परेका ४६९ शवमध्ये चितवनमा १७८, नवलपरासी पूर्वमा ११०, गोरखामा ४४, नुवाकोटमा ३७, धादिङमा ३३, तनहुँमा २८, नवलपरासी पश्चिममा २७ र रसुवामा १२ वटा रहेका छन्। गोरखामा भेटिएका शवमा विभिन्न मानव अंगसमेत समावेश छन्।
बाढीबाट घाइते भएका १ हजार ५४५ जनाको उद्धार गरिएको छ। उनीहरूको नुवाकोटस्थित त्रिशूली अस्पताल तथा काठमाडौंका विभिन्न अस्पतालमा उपचार भइरहेको छ। काठमाडौं उपत्यकाका अस्पतालमा उपचाररत तथा उपचारपछि डिस्चार्ज भएका घाइतेको संख्या ८४ रहेको जनाइएको छ।
१०२ शव पोखरा लगियो
त्रिशूली तथा नारायणी नदी किनारमा फेला परेका १०२ शव पहिचान तथा परीक्षणका लागि पोखरा लगिएको छ। धादिङ, गोरखा, तनहुँ र पूर्वी नवलपरासीलगायतका जिल्लामा फेला परेका शव व्यवस्थापन तथा परीक्षण गर्ने पर्याप्त व्यवस्था नभएपछि पोखरा ल्याइएको कास्कीका सहायक प्रमुख जिल्ला अधिकारी चित्राङ्गद बरालले जानकारी दिए।
उनका अनुसार बिहीबार राति मात्रै पूर्वी नवलपरासीबाट ४१, तनहुँबाट २३, गोरखाबाट ११ र धादिङबाट २७ शव पोखरा ल्याइएको थियो। ती शवको व्यवस्थापन पश्चिमाञ्चल क्षेत्रीय अस्पतालमा गरिएको छ।
तनहुँका विभिन्न स्थानमा फेला परेका नौ शव भने पोखरा स्वास्थ्य विज्ञान प्रतिष्ठानमा परीक्षणपछि मणिपाल शिक्षण अस्पताल पठाइएको छ। पोखराका सरकारी तथा निजी अस्पतालमा गरी एकपटकमा ८८ शव व्यवस्थापन गर्ने क्षमता रहेको बताइएको छ।
शवको परीक्षण र पहिचानपछि स्थानीय प्रशासनले सार्वजनिक सूचना जारी गर्ने तयारी गरेको छ।
बाढीपछिको अवस्थाबारे मन्त्रिपरिषद् बैठक
यसैबीच बाढीपछि उत्पन्न परिस्थितिमा उद्धार, राहत तथा खोजी कार्यलाई थप प्रभावकारी बनाउने विषयमा आवश्यक निर्णय गर्न शुक्रबार मन्त्रिपरिषद्को बैठक बस्दैछ।
बिहीबार बाढी प्रभावित नुवाकोटको स्थलगत अवलोकन गरेका प्रधानमन्त्री बालेन्द्र शाहले बैठक बोलाएका हुन्। प्रधानमन्त्री तथा मन्त्रिपरिषद्को कार्यालय, सिंहदरबारमा बिहान ११ बजे बैठक बस्ने प्रधानमन्त्रीका प्रेस तथा अनुसन्धान विज्ञ दीपा दाहालले जानकारी दिइन्।
पृथ्वीराजमार्ग अझै अवरुद्ध
बाढीका कारण काठमाडौं–मुग्लिन–नारायणगढ सडकखण्डअन्तर्गत पर्ने पृथ्वीराजमार्ग अझै पूर्ण रूपमा सञ्चालनमा आउन सकेको छैन।
धादिङको गल्छी गाउँपालिका र गजुरी गाउँपालिकाका विभिन्न स्थानमा बाढीले ठूलो परिमाणमा लेदो थुपारेपछि सडक अवरुद्ध भएको हो। गजुरीका दुई स्थान र गल्छी गाउँपालिकाको एक स्थानमा अझै लेदो हटाउन बाँकी रहेको स्थानीय प्रशासनले जनाएको छ।
कतिपय स्थानमा तीन मिटरसम्म लेदो थुप्रिएको छ। उपकरण प्रयोग गरी बिहीबार दिनभर सफाइ गरिए पनि सडक पूर्ण रूपमा खुलाउन बाँकी रहेको जिल्ला प्रहरी कार्यालय धादिङले जनाएको छ। आजै सडक सञ्चालनमा ल्याउने गरी काम तीव्र पारिएको छ।
नागढुंगादेखि मुग्लिनसम्मको सडक बाढीको सम्भावित जोखिमका कारण भदौ १० गतेदेखि पूर्ण रूपमा बन्द हुँदा काठमाडौं उपत्यका भित्रिने र बाहिरिने प्रमुख सडकमार्ग प्रभावित भएको छ।
रसुवासँगको सडक सम्पर्क पुनःस्थापना गर्न चुनौती
रसुवाको त्रिशूली–मैलुङ–स्याफ्रुबेंसी सडक पनि बाढीका कारण साउन ८ गतेदेखि पूर्ण रूपमा अवरुद्ध छ। रसुवाका अन्य मुख्य सडकसमेत साउन १० गतेदेखि बन्द अवस्थामा छन्।
बाढीका कारण रसुवा जोडिने करिब ४० किलोमिटर सडक पूर्ण रूपमा क्षतिग्रस्त भएको जनाइएको छ।
नेपाल–चीन जोड्ने प्रमुख नाका क्षेत्रतर्फका ४१ वटा पुल बाढीले पूर्ण रूपमा क्षति पुर्याएको छ। हाल ५० मिटरसम्म लम्बाइ भएका सात वटा बेलिब्रिज मात्रै मौज्दात रहेको र आवश्यकता तथा सम्भाव्यता अध्ययन गरेर तिनलाई विभिन्न स्थानमा जडान गर्ने तयारी भइरहेको छ।
क्षतिग्रस्त अन्य स्थानमा पुल निर्माणका लागि भारत र चीनले तत्काल बेलिब्रिज उपलब्ध गराउने प्रतिबद्धता जनाएका छन्।
सरकारले पहिलो चरणमा पृथ्वीराजमार्ग सञ्चालनमा ल्याउने र रसुवालाई पुनः सडक सञ्जालसँग जोड्ने गरी काम अघि बढाएको छ। यसअन्तर्गत वेत्रावतीमा बेलिब्रिज जडान गर्ने तयारी भइरहेको छ। वेत्रावतीसम्म सडक सञ्चालनमा नआएसम्म धुन्चे हुँदै स्याफ्रुबेँसी पुग्न कठिन हुने अवस्था छ।
सडक खुलाउने कामलाई तीव्रता दिन सरकारी र निजी क्षेत्रका गरी २० वटा भारी उपकरण परिचालन गरिएको जनाइएको छ।
