काठमाडौं, फागुन ७ — काठमाडौं उपत्यकामा विभिन्न समयमा चोरी भएका ५३ मोटरसाइकल तथा स्कुटर ट्राफिक प्रहरीले खोजी गरी सम्बन्धित धनीलाई फिर्ता गरेको छ। सादा पोसाकमा परिचालन गरिएको विशेष टोलीले उपत्यकाका विभिन्न स्थानमा लुकाइराखिएका तथा प्रयोगमा रहेका सवारी साधन पत्ता लगाएको हो।
ट्राफिक प्रहरीका अनुसार फेला परेका सवारीमध्ये ३१ मोटरसाइकल र २२ स्कुटर रहेका छन्। अनुसन्धानका क्रममा चोरीपछि ती सवारी साधनको नम्बर प्लेट परिवर्तन गर्ने, बाहिरी बनावट हेरफेर गर्ने र नक्कली कागजात तयार गरी बिक्री वितरण गर्ने गिरोह सक्रिय रहेको तथ्य खुलेको छ।
प्रहरीले बरामद गरेका अधिकांश सवारी उपत्यका आसपासका जिल्लामा प्रयोग भइरहेको अवस्थामा भेटिएका थिए। पहिचान खुलिसकेपछि कानुनी प्रक्रिया पूरा गरी धनीलाई जिम्मा लगाइएको ट्राफिक प्रहरी कार्यालयले जनाएको छ।
ट्राफिक प्रहरीले सवारी हराए वा चोरी भएको शंका लागेमा ढिलाइ नगरी नेपाल प्रहरीको आपतकालीन नम्बर १०० वा ट्राफिक प्रहरीको हटलाइन १०३ मा जानकारी गराउन सर्वसाधारणलाई अनुरोध गरेको छ। समयमै सूचना प्राप्त हुँदा खोजी कार्य प्रभावकारी हुने र सवारी सुरक्षित फिर्ता गराउने सम्भावना बढ्ने प्रहरीले जनाएको छ।
उपत्यकामा सवारी चोरीका घटनालाई नियन्त्रण गर्न निगरानी, गोप्य परिचालन र चेकजाँचलाई थप कडा बनाइएको ट्राफिक प्रहरीको भनाइ छ।
