बीपी राजमार्ग अवरुद्ध: मंगलटारमा सयौँ यात्रु अलपत्र, उद्धार जारी

हेटौँडा, बैशाख १३ — अविरल वर्षासँगै आएको बाढीका कारण बीपी राजमार्ग अवरुद्ध हुँदा काभ्रेको मंगलटार क्षेत्रमा सयौँ यात्रु अलपत्र परेका छन्। सुरक्षाकर्मी र स्थानीयको संयुक्त प्रयासमा आइतबार बिहानदेखि उद्धार कार्य तीव्र पारिएको छ।
जिल्ला प्रहरी कार्यालय काभ्रेका अनुसार रोशी खोला मा पानीको बहाव अत्यधिक बढेपछि विभिन्न स्थानका अस्थायी डाइभर्सन बगाएका छन्। साथै, सडकमा पहिरो खस्दा शनिबार दिउँसोदेखि नै यातायात पूर्णरूपमा ठप्प बनेको हो।
प्रहरी नायव उपरीक्षक रविन विष्ट ले जोखिमयुक्त क्षेत्रमा फसेका यात्रुलाई पैदलमार्ग हुँदै सुरक्षित स्थानतर्फ सार्ने काम भइरहेको जानकारी दिए। आवश्यक परेको खण्डमा वैकल्पिक यातायातको व्यवस्था गर्ने तयारीसमेत भइरहेको उनको भनाइ छ।
रोशी गाउँपालिका अन्तर्गत पर्ने मंगलटारमा बस, माइक्रोबस र निजी सवारी साधन लामो समयदेखि रोकिँदा यात्रु बीच सडकमै अलपत्र परेका छन्।
मौसममा तत्काल सुधार नआएसम्म सवारी सञ्चालन सहज हुने सम्भावना कम देखिएको छ। सडक डिभिजन कार्यालयले वर्षा रोकिएपछि मात्रै क्षतिग्रस्त डाइभर्सन मर्मत र पहिरो पन्छाउने काम सुरु गर्ने जनाएको छ।
यसअघि पनि २०८१ असोजमा गएको बाढी–पहिरोले क्षतिग्रस्त बनाएको यो राजमार्ग सानो वर्षामै पटक–पटक अवरुद्ध हुँदै आएको छ।