नेपाल ‘ए’को दमदार प्रदर्शन, स्कटल्यान्डअघि २७८ रनको चुनौती

काठमाडौं, २४ वैशाख — पहिलो एकदिवसीय खेलमा नेपाल ‘ए’ टोलीले सशक्त ब्याटिङ प्रदर्शन गर्दै स्कटल्यान्डलाई २७८ रनको लक्ष्य प्रस्तुत गरेको छ।
माथिल्लो मुलपानी क्रिकेट मैदानमा बिहीबार पहिले ब्याटिङ गरेको नेपाल ‘ए’ले निर्धारित ५० ओभरमा ८ विकेट गुमाउँदै २७७ रन जोड्यो। सुरुआत मध्यम भए पनि मध्यक्रम र अन्त्यतिरको आक्रामक खेलले टोलीलाई प्रतिस्पर्धी स्कोरसम्म पुर्‍यायो।
नेपालका लागि देव खनालले उत्कृष्ट ६३ रन बनाउँदै इनिङ्स सम्हाले। उनलाई मयन यादव (४५), सन्दीप जोरा (३४) र पवन सर्राफ (३१) ले राम्रो साथ दिए। साथै अनिल शाहले १८ र बसिर अहमदले १७ रनको योगदान गरे।
अन्तिमतिर दिपक डुम्रेले विस्फोटक ब्याटिङ गर्दै खेलको दिशा बदलिदिए। उनले केवल ७ बलमा अविजित २३ रन बनाउने क्रममा अन्तिम ओभरमा लगातार पाँच चौका प्रहार गरे। रासिद खानले पनि १० बलमा १४ रन थप्दै टोलीलाई बलियो स्कोरतर्फ धकेले।
स्कटल्यान्डका बलरमध्ये ब्राड्ली करी र सफयान सरिफले समान २–२ विकेट लिए भने अन्य चार बलरले एक–एक विकेट झारे।
अब स्कटल्यान्डले केहीबेरमा २७८ रनको लक्ष्य पछ्याउँदै जवाफी ब्याटिङ सुरु गर्नेछ।