काठमाडौं । स्पेनिस ला लिगाको नयाँ सिजनमा साबिक विजेता FC Barcelona ले आफ्नो उत्कृष्ट प्रदर्शनलाई निरन्तरता दिएको छ। बार्सिलोनाले रायो भायकानोलाई ५–२ गोलले पराजित गर्दै लगातार तेस्रो जित दर्ता गरेको हो।
घरेलु मैदान क्याम्प नोउमा भएको खेलमा बार्सिलोनाका लागि कप्तान राफिन्हा र युवा स्टार लामिन यामलले उत्कृष्ट प्रदर्शन गरे। दुवैले समान दुई गोल गरे भने अर्को गोल विपक्षी खेलाडीको आत्मघाती गोलबाट प्राप्त भयो।
खेलको १२औँ मिनेटमा सर्जियो कामेलोले गोल गर्दै रायो भायकानोलाई सुरुआती अग्रता दिलाएका थिए। तर, बार्सिलोनाले त्यसलाई धेरै समय टिक्न दिएन। १९औँ मिनेटमा राफिन्हाले गोल गर्दै खेल १–१ को बराबरीमा ल्याए।
त्यसको दुई मिनेटपछि नै लामिन यामलले गोल गरेपछि बार्सिलोना २–१ ले अघि बढ्यो। दोस्रो हाफमा रायो भायकानोका फ्लोरियन लेजेउनेले आत्मघाती गोल गरेपछि घरेलु टोलीको अग्रता ३–१ मा पुग्यो।
५९औँ मिनेटमा कामेलोले व्यक्तिगत दोस्रो गोल गर्दै रायो भायकानोलाई पुनः खेलमा फर्काउने प्रयास गरे। तर बार्सिलोनाले त्यसपछि थप दुई गोल गर्यो। ७१औँ मिनेटमा राफिन्हाले व्यक्तिगत दोस्रो गोल गरे भने ९०औँ मिनेटमा यामलले पनि दोस्रो गोल पूरा गरे।
अन्ततः बार्सिलोना ५–२ को प्रभावशाली जितसहित मैदानबाट बाहिरियो।
यो जितसँगै तीन खेलबाट ९ अंक जोडेको बार्सिलोना ला लिगाको शीर्ष स्थानमा पुगेको छ। यता, रायो भायकानोले तीन खेलबाट एक अंक मात्र जोडेको छ र १८औँ स्थानमा छ।
