काठमाडौं, असोज २१-फ्रान्समा विद्यालयका लागि थप स्रोतसाधन र सुविधाको माग गर्दै सुरु भएको विद्यार्थी आन्दोलन तीव्र बन्दै गएको छ।
आन्दोलन देशका विभिन्न क्षेत्रमा फैलिँदा सयौं उच्च माध्यमिक विद्यालय प्रभावित भएका छन् भने कतिपय स्थानमा तोडफोड र आगजनीका घटना समेत भएका छन्।
प्रदर्शनका क्रममा विद्यार्थी, कर्मचारी र प्रहरी घाइते भएका छन्। विशेषगरी प्रदर्शन नियन्त्रणका क्रममा प्रहरीले प्रयोग गर्ने उपकरणका कारण युवा प्रदर्शनकारी गम्भीर घाइते भएको घटनाले सरकारमाथि थप दबाब सिर्जना गरेको छ।
फ्रान्सका गृहमन्त्री लरेन्ट नुनेजका अनुसार आन्दोलनका क्रममा हालसम्म ६ हजार १ सयभन्दा बढी व्यक्ति पक्राउ परिसकेका छन्। उनका अनुसार ७१५ जना प्रहरी अधिकारीसमेत घाइते भएका छन्।
प्रहरीको कारबाही अधिकांश घटनामा परिस्थितिअनुसार उचित रहेको गृहमन्त्री नुनेजको दाबी छ। तर, प्रहरीको प्रतिक्रिया र बल प्रयोगलाई लिएर आलोचना बढ्दै गएपछि राष्ट्रपति इम्यानुएल म्याक्रोन नेतृत्वको सरकार थप दबाबमा परेको छ।
विद्यालयमा आधारभूत सुविधाको माग
विद्यार्थी आन्दोलनको मुख्य कारण विद्यालयमा पर्याप्त स्रोतसाधन र आधारभूत सुविधाको अभाव रहेको बताइएको छ। विशेषगरी आर्थिक रूपमा कमजोर क्षेत्रका विद्यालयमा डेस्क–बेन्च तथा कुर्सीको अभाव, गर्मीका समयमा अत्यधिक तात्ने कक्षाकोठा र आवश्यक कर्मचारी नहुँदा विद्यार्थी प्रभावित भएको गुनासो छ।
विद्यार्थीहरूले विद्यालयको अवस्था सुधार गर्दै समान रूपमा गुणस्तरीय शिक्षा पाउने वातावरण बनाउन सरकारसँग माग गरेका छन्।
सेप्टेम्बरको मध्यतिर राजधानी पेरिस आसपासबाट सुरु भएको आन्दोलन विस्तारै फ्रान्सका अन्य सहर र नगरसम्म फैलिएको हो।
विद्यार्थी आन्दोलनप्रति समर्थन जनाउँदै मजदुर युनियनहरूले समेत प्रदर्शन र र्याली आयोजना गरेका छन्। मंगलबार पेरिसमा भएको प्रदर्शनमा सहभागीहरूले ‘युवाहरू नै भविष्य हुन् भन्नुहुन्छ भने उनीहरूको आवाज पनि सुन्नुहोस्’ भन्ने सन्देशसहितका प्लेकार्ड प्रदर्शन गरेका थिए।
लगातार बढिरहेको प्रदर्शन र प्रहरी कारबाहीप्रतिको असन्तुष्टिका कारण फ्रान्स सरकारलाई विद्यार्थीका माग सम्बोधन गर्नुका साथै बढ्दो तनाव नियन्त्रण गर्ने चुनौती थपिएको छ।
