इरानी जहाज रोकेपछि मध्यपूर्वमा तनाव बढ्दै, अमेरिका–इरान सम्बन्ध फेरि ताते

काठमाडौं, वैशाख १२ — मध्यपूर्व क्षेत्रमा अमेरिका र इरानबीचको तनाव फेरि चर्किएको छ। अमेरिकी केन्द्रीय कमाण्ड (सेन्टकम) का अनुसार अमेरिकी युद्धपोतले इरानतर्फ जाँदै गरेको एक जहाजलाई रोकेको छ।
सेन्टकमले सामाजिक सञ्जालमार्फत जानकारी दिँदै शुक्रबार ‘यूएसएस राफेल पेराल्टा’ नामक गाइडेड मिसाइल विनाशकले इरानी झन्डावाला जहाजलाई नियन्त्रणमा लिएको जनाएको हो। उक्त कदम इरानी बन्दरगाहतर्फ हुने गतिविधिमा कडाइ गरिएको संकेतका रूपमा हेरिएको छ।
यसअघि पनि अमेरिकाले इरानी बन्दरगाह वरिपरि नाकाबन्दी गर्दै आएको छ। सेन्टकमका अनुसार अहिलेसम्म ३४ वटा जहाजलाई आफ्नो गन्तव्य परिवर्तन गर्न बाध्य पारिएको छ। यो कदम इरानमाथि दबाब बढाउने रणनीतिका रूपमा लिइएको छ।
यो घटनाक्रम त्यतिबेला भएको हो जब अमेरिका र इरानबीचको पछिल्लो चरणको वार्ता निष्कर्षविहीन बनेको थियो। त्यसपछि अमेरिकी राष्ट्रपति डोनाल्ड ट्रम्प नेतृत्वको प्रशासनले कडा नीति अपनाउँदै नाकाबन्दीलाई थप कडाइ गरेको बताइएको छ।
इरानले भने अमेरिकी कदमको कडा विरोध गर्दै यसलाई युद्धविरामको उल्लंघनको रूपमा व्याख्या गरेको छ। साथै, उसले रणनीतिक रूपमा महत्वपूर्ण होर्मुज जलडमरू बन्द गर्ने चेतावनी दिएको छ, जसले विश्व ऊर्जा आपूर्तिमा असर पार्न सक्ने अनुमान गरिएको छ।
यसैबीच, इरानका विदेशमन्त्री अब्बास अराघची शनिबार पाकिस्तानको राजधानी इस्लामाबाद पुगेका छन्। त्यहाँ उनले उच्चस्तरीय भेटवार्ता गर्ने कार्यक्रम रहेको बताइएको छ।
यद्यपि, हाल इरान र अमेरिकाबीच कुनै औपचारिक वार्ता हुने संकेत देखिएको छैन। इरानले आफ्नो प्रस्ताव पाकिस्तानमार्फत अघि बढाउने तयारी गरेको जनाइएको छ।
विश्लेषकहरूका अनुसार पछिल्लो घटनाक्रमले मध्यपूर्वमा सुरक्षा चुनौती थप जटिल बन्ने संकेत दिएको छ।