लगातार दोस्रो जितसँगै नेपाल साफ महिला च्याम्पियनसिपको सेमिफाइनलमा

काठमाडौँ : नेपाली महिला फुटबल टोलीले शानदार प्रदर्शन जारी राख्दै साफ महिला च्याम्पियनसिपको सेमिफाइनल यात्रा तय गरेको छ। भारतको गोवास्थित पण्डित जवाहरलाल नेहरू रंगशालामा आइतबार सम्पन्न समूह ‘ए’ अन्तर्गतको खेलमा नेपालले श्रीलंकामाथि २–० को सहज जित निकाल्यो।
खेलको पहिलो हाफको इन्जुरी समयमा रश्मीकुमारी घिसिङले गोल गर्दै नेपाललाई अग्रता दिलाएकी थिइन्। त्यसपछि दोस्रो हाफको ६०औँ मिनेटमा कप्तान रेनुका नगरकोटेले अर्को गोल थप्दै नेपालको जित सुनिश्चित गरिन्।
लगातार दोस्रो जित दर्ता गरेको नेपालले दुई खेलबाट ६ अंक जोड्दै समूहको शीर्ष स्थान कब्जा गरेको छ। यसअघि नेपालले पहिलो खेलमा भुटानलाई १–० ले पराजित गरेको थियो।
साफ महिला च्याम्पियनसिपमा नेपाल विगतमा पटक–पटक फाइनलसम्म पुगे पनि उपाधि जित्न सफल भएको छैन। यसपटक भने नेपाली टोली पहिलो पटक ट्रफी उचाल्ने लक्ष्यसहित प्रतियोगितामा सहभागी भएको छ।