विश्वकपमा नर्वेको प्रभावशाली सुरुआत, इराकमाथि ४–१ को शानदार जित

फिफा विश्वकप–२०२६ अन्तर्गत बुधबार बिहान बोस्टन स्टेडियममा सम्पन्न खेलमा नर्वेले इराकलाई ४–१ गोलअन्तरले पराजित गर्दै प्रतियोगितामा सुखद सुरुआत गरेको छ।
नर्वेको जितमा स्टार फरवार्ड Erling Haaland चम्किए। उनले दुई गोल गर्दै टोलीको आक्रमणलाई नेतृत्व गरे। खेलको २९औँ मिनेटमा एन्टोनियो नुसाको पासमा हालान्डले गोल गर्दै नर्वेलाई अग्रता दिलाएका थिए।
इराकले भने ३९औँ मिनेटमा Aymen Hussein को हेडर गोलमार्फत खेललाई १–१ को बराबरीमा ल्याएको थियो। तर पहिलो हाफ सकिनुअघि नै इराकी रक्षापंक्तिको कमजोरीको फाइदा उठाउँदै हालान्डले व्यक्तिगत दोस्रो गोल गरे र नर्वेलाई पुनः २–१ को अग्रता दिलाए।
दोस्रो हाफमा नर्वेले खेलमाथि पकड कायम राख्यो। ७६औँ मिनेटमा मैदान प्रवेश गरेका Leo Østigård ले हेडरमार्फत गोल गर्दै अग्रता ३–१ पुर्‍याए। खेलको अन्त्यतिर इराकका आयमेन हुसेनबाट आत्मघाती गोल भएपछि नर्वेको जित अझ फराकिलो बन्यो।
४० वर्षपछि विश्वकपमा फर्किएको इराकलाई नर्वेले दबाबमा राख्दै सहज जित निकालेको हो। २८ वर्षपछि विश्वकप खेलिरहेको नर्वेले यस जितसँगै महत्वपूर्ण ३ अंक हासिल गरेको छ।
अब नर्वेले आगामी जुन २६ मा Senegal सँग प्रतिस्पर्धा गर्नेछ भने पराजित इराकले बलियो टोली France को चुनौती सामना गर्नेछ।