काठमाडौं । भोटेकोसी बाढीपछि नदी किनारमा भेटिएका शवको संख्या १ हजार २५२ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बिहीबार मध्याह्न १२ बजेसम्म विभिन्न जिल्लामा उक्त संख्यामा शव फेला परेका हुन्।
प्राधिकरणका अनुसार सबैभन्दा धेरै शव चितवनमा भेटिएका छन्। चितवनमा २५५, नवलपरासी पूर्वमा २१८ र नवलपरासी पश्चिममा २०८ जनाको शव फेला परेको छ।
त्यस्तै नुवाकोटमा १७७, रसुवामा १२७, गोरखामा ६९, धादिङमा ६० र तनहुँमा ३८ जनाको शव भेटिएको प्राधिकरणले जनाएको छ।
बाढीपछि अझै ४ हजार २१६ जना सम्पर्कविहीन छन्। बेपत्ता हुनेमा जलविद्युत् आयोजनामा कार्यरत कर्मचारी तथा मजदुरको संख्या उल्लेख्य रहेको छ। विभिन्न ११ वटा जलविद्युत् आयोजनामा कार्यरत करिब ९ सय जना अझै सम्पर्कविहीन रहेको प्राधिकरणले जनाएको छ।
यसैगरी, ५८३ जना विदेशी पर्यटक पनि सम्पर्कविहीन छन्। रसुवा जिल्लामा मात्रै ८६५ जना सम्पर्कविहीन रहेको विवरण सार्वजनिक भएको छ।
सम्पर्कविहीनहरूको खोजी तथा उद्धार कार्यलाई तीव्र पारिएको छ। नेपाली सुरक्षाकर्मीका साथै चीन, भारत र दक्षिण कोरियाबाट आएका उद्धार टोलीसमेत खोज तथा उद्धारमा परिचालित छन्।
बाढी प्रभावित क्षेत्रमा खोजी कार्य जारी रहेकाले मृतक तथा सम्पर्कविहीनको संख्या अझै बढ्न सक्ने अधिकारीहरूले बताएका छन्।
