काठमाडौं, असोज ३१। नेपाली कांग्रेसका नवनिर्वाचित सभापति गगनकुमार थापाले आज शपथग्रहण गरी पदबहाली गर्ने भएका छन्।
पार्टीको १५औँ महाधिवेशनबाट सभापतिमा निर्वाचित भएपछि थापाले औपचारिक रूपमा नेतृत्वको जिम्मेवारी सम्हाल्न लागेका हुन्।
नेपाली कांग्रेसका अनुसार दसैँको फूलपातीका अवसरमा आज दिउँसो २ बजे पार्टीको केन्द्रीय कार्यालयमा शपथग्रहण कार्यक्रम आयोजना गरिएको छ। शपथ लिएलगत्तै थापाले सभापतिको पदभार ग्रहण गर्ने कार्यक्रम रहेको छ।
महाधिवेशनको मतगणना सम्पन्न भएसँगै नवनिर्वाचित सभापतिको शपथग्रहण तथा पदबहालीको कार्यक्रम तय गरिएको हो। समारोहमा सहभागी हुन केन्द्रीय कार्यालयले उपत्यकामा रहेका पार्टीका नेता, कार्यकर्ता तथा सञ्चारकर्मीलाई निमन्त्रणा गरेको कार्यवाहक मुख्यसचिव कृष्णप्रसाद दुलालले जानकारी दिएका छन्।
कांग्रेसले केन्द्रीय समितिका अन्य पदाधिकारी तथा सदस्यहरूको शपथग्रहण भने दसैँपछि गर्ने जनाएको छ। महाधिवेशनबाट पार्टीको २३१ सदस्यीय केन्द्रीय समिति निर्वाचित भएको छ।
