काठमाडौं, असोज ३१। भारतको सत्तारूढ भारतीय जनता पार्टी (भाजपा)ले विपक्षी दलहरूले निर्वाचन आयोगविरुद्धको आन्दोलनलाई आधार बनाएर देशमा राजनीतिक अस्थिरता सिर्जना गर्न खोजेको आरोप लगाएको छ।
भाजपाका वरिष्ठ नेता तथा रक्षामन्त्री राजनाथ सिंहले विपक्षी दलहरूले बंगलादेशको शैलीमा भारतमा शासन परिवर्तनको प्रयास गरिरहेको दाबी गरेका हुन्।
शुक्रबार आयोजित पत्रकार सम्मेलनमा सिंहले कांग्रेस र उसका सहयोगी दलहरूले निर्वाचन सुधार तथा विशेष गहन पुनरावलोकन (एसआईआर) लगायतका विषयलाई बहाना बनाएर देशमा अराजकता फैलाउन खोजेको आरोप लगाए।
उनका अनुसार विपक्षी दलहरूको उद्देश्य निर्वाचन सुधार, मुख्य निर्वाचन आयुक्त ज्ञानेश कुमार वा युवाहरूको भविष्यसँग सम्बन्धित नभई राजनीतिक अस्थिरता उत्पन्न गरेर सत्ता कब्जा गर्नु रहेको छ। उनले युवाहरूलाई अराजक राजनीतिमा प्रयोग गर्न खोजिएको दाबीसमेत गरे।
कांग्रेसको प्रतिवाद : निर्वाचनबाटै सत्ता परिवर्तन हुन्छ
भाजपाको आरोपको जवाफ दिँदै कांग्रेसका सांसद पवन खेडाले लोकतान्त्रिक व्यवस्थामा सरकार परिवर्तन गर्ने माध्यम निर्वाचन भएको बताएका छन्।
उनले विपक्षी दलले सडकमा आन्दोलन गर्दा शासन परिवर्तनको विषय उठ्नु स्वाभाविक भए पनि भारतजस्तो लोकतान्त्रिक मुलुकमा सत्ता परिवर्तन निर्वाचनमार्फत नै हुने स्पष्ट पारे।
खेडाका अनुसार आवधिक निर्वाचनबाट सरकार परिवर्तन गर्नु लोकतन्त्रमा विपक्षी दलको संवैधानिक दायित्व र प्रमुख उद्देश्य हो।
भाजपा र कांग्रेसबीच निर्वाचन आयोगको भूमिका, निर्वाचन सुधार तथा विपक्षी आन्दोलनलाई लिएर आरोप–प्रत्यारोप चलिरहेको छ।
