जनकपुरधाम, ५ माघ २०८२
राष्ट्रिय स्वतन्त्र पार्टी (रास्वपा)ले मधेशमा पहिलोपटक भव्य रूपमा परिवर्तन उद्घोष सभा आयोजना गर्दै जनकपुरबाट चुनावी अभियानलाई औपचारिक गति दिएको छ। धनुषाको जनकपुरधाममा आयोजित सभामा रास्वपाका सभापति रवि लामिछाने, वरिष्ठ नेता बालेन्द्र शाह (बालेन) र प्रवक्ता मनिष झाले सम्बोधन गर्दै परिवर्तनको नयाँ राजनीतिक एजेन्डा प्रस्तुत गरेका छन्।
सभालाई सम्बोधन गर्दै सभापति रवि लामिछानेले मधेशलाई अब केवल भाषणको विषय नभई नीति र निर्णयको केन्द्र बनाइने बताए। उनले जनताको भरोसामाथि राजनीति गर्ने पुरानो शैली अन्त्य गरेर परिणाममुखी शासन दिने प्रतिबद्धता व्यक्त गरे।
बालेन प्रधानमन्त्रीको उम्मेदवार
सभामा रास्वपाले बालेन्द्र शाहलाई आगामी निर्वाचनका लागि प्रधानमन्त्रीको उम्मेदवारका रूपमा अघि सार्दै झापा–५ बाट उम्मेदवारी दिने निर्णय सार्वजनिक गरेको छ। बालेनले देशको विकास र सुशासनका लागि नयाँ सोच, नयाँ कार्यशैली र युवाको नेतृत्व आवश्यक भएको बताए।
मनिष झाको उम्मेदवारी घोषणा
रास्वपाका प्रवक्ता मनिष झाले जनकपुर क्षेत्र नम्बर–३ बाट उम्मेदवारी घोषणा गर्दै बालेन नेतृत्वमा बन्ने सरकारको सदस्य बन्ने लक्ष्य रहेको स्पष्ट पारे।
‘म बालेनजीको नेतृत्वमा बन्ने सरकारमा रहेर काम गर्न चाहन्छु। त्यसका लागि तपाईंहरूको मत, मन र साथ आवश्यक छ,’ उनले भने।
जनकपुरलाई अध्यात्मको विश्व केन्द्र बनाउने प्रतिबद्धता
मनिष झाले निर्वाचित भए जानकी मन्दिरलाई युनेस्कोको विश्वसम्पदा सूचीमा सूचीकृत गराउने, अयोध्या–जनकपुर धार्मिक सर्किट विकास गर्ने र जनकपुरलाई अध्यात्मको विश्व राजधानीका रूपमा स्थापित गर्ने योजना सुनाए।
उनले युवाका लागि राम–जानकी रंगशाला निर्माण, सुशासन प्रवर्द्धन, सार्वजनिक सेवा सुधार र रोजगारी सिर्जनालाई प्राथमिकता दिने प्रतिबद्धता जनाए।
दीर्घकालीन राजनीतिक रोडम्याप
रास्वपाले १०, १५ र २० वर्षको स्पष्ट विकास योजना तयार गरेको उल्लेख गर्दै मनिष झाले मतदातालाई भावनामा होइन, योजनामा आधारित भएर मत दिन आग्रह गरे।
‘हामी पाँच वर्षपछि रिपोर्ट कार्ड लिएर आउनेछौं,’ उनले भने, ‘काम देखाएर फेरि मत माग्नेछौं।’
मधेशबाट परिवर्तनको संकेत
सभामा अमरेशकुमार सिंहको नेतृत्वमा मधेशमा ठोस परिवर्तन गरेर देखाउने प्रतिबद्धता समेत व्यक्त गरियो। जनकपुरको सभालाई रास्वपाले मधेशमा राजनीतिक उपस्थितिको निर्णायक सुरुवातको रूपमा लिएको छ।
