इरानको दाबी : अमेरिकी ड्रोन इरानी आकाशमै खसालियो

मध्यपूर्वमा फेरि तनाव चुलिएको छ। इरानले आफ्नो हवाई क्षेत्रमा प्रवेश गरेको अमेरिकी ड्रोन खसालिएको दाबी गरेपछि अमेरिका–इरान सम्बन्ध थप संवेदनशील बनेको छ।
इरानको इस्लामिक रिभोलुसनरी गार्ड कोर्प्स (आईआरजीसी) ले आइतबार एक विज्ञप्ति जारी गर्दै अमेरिकी एमक्यू–१ ड्रोन आफ्नो हवाई क्षेत्रमा प्रवेश गरेपछि नष्ट गरिएको जनाएको हो।
इरानी अर्ध–सरकारी समाचार एजेन्सी तस्निमका अनुसार आईआरजीसीको वायु रक्षा प्रणालीले ड्रोनलाई पहिचान गरेलगत्तै मिसाइल प्रहार गरेर खसालेको थियो। इरानले उक्त ड्रोन ‘शत्रुतापूर्ण उद्देश्य’ सहित आफ्नो सीमाभित्र आएको आरोप लगाएको छ।
आईआरजीसीले आफ्नो निगरानी प्रणाली पूर्ण रूपमा सक्रिय रहेको दाबी गर्दै इरानी आकाशमा हुने कुनै पनि गतिविधिमाथि कडा निगरानी राखिएको जनाएको छ।
घटनाबारे अमेरिकी केन्द्रीय कमान्ड (सेन्टकम) ले भने तत्काल कुनै औपचारिक प्रतिक्रिया दिएको छैन। अमेरिकी पक्ष मौन रहे पनि घटनाले दुई देशबीचको तनाव फेरि बढ्ने संकेत देखिएको विश्लेषण गरिएको छ।
यसैबीच अमेरिकी राष्ट्रपति Donald Trump ले इरानसँगको सम्भावित सम्झौताबारे आफू हतारमा नरहेको बताएका छन्। फक्स न्युजसँगको अन्तर्वार्तामा उनले अमेरिकाले आफ्ना रणनीतिक सर्तहरू क्रमशः लागू गरिरहेको दाबी गरे।
ट्रम्पले इरानले आणविक हतियार नबनाउने मात्रै होइन, नकिन्ने प्रतिबद्धता समेत जनाएको उल्लेख गर्दै आवश्यक परे सैन्य विकल्प प्रयोग गर्न सकिने चेतावनी दिएका छन्।
पछिल्ला महिनाहरूमा अमेरिका र इरानबीच आणविक कार्यक्रम, क्षेत्रीय सुरक्षा र सैन्य गतिविधिलाई लिएर लगातार तनाव बढ्दै गएको छ। यस्तो अवस्थामा ड्रोन खसालिएको इरानी दाबीलाई अन्तर्राष्ट्रिय समुदायले चासोका साथ हेरिरहेको छ।