विश्वकप क्वार्टरफाइनलमा आज फ्रान्स र मोरक्को आमनेसामने, पुरानो हारको बदला लिने लक्ष्यमा मोरक्को

काठमाडौं, असार २५ — फिफा विश्वकप २०२६ अन्तर्गत आज हुने पहिलो क्वार्टरफाइनलमा साविक उपविजेता फ्रान्स र अफ्रिकी फुटबलको बलियो टोली मोरक्कोबीच रोमाञ्चक प्रतिस्पर्धा हुँदैछ। दुवै टोली सेमिफाइनल पुग्ने लक्ष्यसहित मैदान उत्रँदैछन्।
मोरक्कोका लागि यो खेल विशेष महत्वको छ। सन् २०२२ को कतार विश्वकपको सेमिफाइनलमा फ्रान्ससँग २–० ले पराजित भएको मोरक्को यसपटक त्यही हारको बदला लिने योजनामा छ। यता कप्तान किलियन एम्बाप्पेको नेतृत्वमा रहेको फ्रान्स लगातार तेस्रो पटक विश्वकपको फाइनल पुग्ने अभियानलाई अघि बढाउन चाहन्छ।
फ्रान्सले समूह चरणमा सेनेगल, इराक र नर्वेलाई पराजित गर्दै शतप्रतिशत अंकका साथ समूह विजेता बनेको थियो। त्यसपछि स्वीडेनलाई ३–० ले हराउँदै अन्तिम १६ मा पुगेको फ्रान्सले पाराग्वेलाई १–० ले पराजित गर्दै क्वार्टरफाइनलमा स्थान सुरक्षित गरेको हो।
मोरक्कोले भने समूह चरणमा ब्राजिलसँग बराबरी खेल्दै स्कटल्यान्ड र हाइटीलाई पराजित गरेको थियो। नकआउट चरणमा नेदरल्यान्ड्सलाई टाइब्रेकरमा तथा आयोजक क्यानाडालाई ३–० ले हराएर अन्तिम आठमा स्थान बनाएको हो।
विश्वकपमा यी दुई टोलीबीच यसअघि भएको एकमात्र भेटमा फ्रान्स विजयी भएको थियो। समग्र अन्तर्राष्ट्रिय भेटमा पनि फ्रान्सले ६ मध्ये ४ खेल जितेको छ भने मोरक्कोले एक खेल जित्दा एक खेल बराबरीमा टुङ्गिएको छ।
फ्रान्सका एम्बाप्पे, डेम्बेले, माइकल ओलिसे र ब्राड्ली बार्कोला उत्कृष्ट लयमा छन्। मोरक्कोका कप्तान अचराफ हाकिमी, एजेदिन उनाही र सुफियान रहिमी टोलीका मुख्य खेलाडी रहनेछन्। चोटका कारण इस्माइल साइबारी भने यो खेलमा उपलब्ध हुने छैनन्।
दुवै टोली उत्कृष्ट प्रदर्शन गर्दै आएकाले आजको खेल विश्व फुटबल समर्थकका लागि अत्यन्त रोमाञ्चक हुने अपेक्षा गरिएको छ। विजेता टोलीले सेमिफाइनलमा स्थान बनाउनेछ।