इरानमा अमेरिकी हवाई आक्रमण तीव्र, ३८ जनाको मृत्यु, ४०० भन्दा बढी घाइते

काठमाडौं, साउन २ — अमेरिकाले इरानमाथिको सैन्य आक्रमणलाई थप तीव्र बनाएको छ। शुक्रबार राति पनि अमेरिकी सेनाले इरानका विभिन्न प्रान्तमा हवाई हमला जारी राख्दा हालसम्म कम्तीमा ३८ जनाको मृत्यु भएको र ४०० भन्दा बढी घाइते भएको इरानको स्वास्थ्य मन्त्रालयले जनाएको छ।
अमेरिकी आक्रमणबाट होर्मोजगन, बुसेहर, सिस्तान–बलुचिस्तान, खुजेस्तान र लोरेस्तान लगायतका प्रान्त प्रभावित भएका छन्। पुल, ऊर्जा पूर्वाधार, समुद्री निगरानी टावर तथा अन्य नागरिक संरचनामा समेत क्षति पुगेको इरानी सञ्चारमाध्यमहरूले जनाएका छन्।
चाबहारस्थित शाहिद कलान्तरी बन्दरगाहको समुद्री निगरानी टावर ध्वस्त भएको छ। अमेरिकी सेन्ट्रल कमान्ड (सेन्टकम) ले उक्त निगरानी टावरलाई सफलतापूर्वक नष्ट गरिएको पुष्टि गर्दै यसलाई इरानको इस्लामिक रिभोलुसनरी गार्ड (आईआरजीसी) ले होर्मुज जलडमरूमध्य हुँदै हुने समुद्री गतिविधिको निगरानीका लागि प्रयोग गर्दै आएको जनाएको छ।
इरानी समाचार एजेन्सी इरनाका अनुसार प्राविधिक टोलीले क्षतिको मूल्याङ्कन तथा बन्दरगाह सञ्चालन पुनः सुरु गर्ने तयारी थालेको छ। सुरक्षा परीक्षण पूरा भएपछि कार्गो सेवा पुनः सञ्चालन गरिने बताइएको छ।
होर्मोजगन प्रान्तमा मात्र छ वटा पुलमा क्षति पुगेको छ भने बन्दर अब्बास, बन्दर खमीर र लार जोड्ने सडक सञ्जाल प्रभावित भएको अधिकारीहरूले बताएका छन्। केही आवासीय क्षेत्रमा समेत आक्रमण हुँदा सर्वसाधारण हताहत भएका छन्।
खुजेस्तान, बुसेहर र लोरेस्तान प्रान्तमा पनि अमेरिकी हवाई आक्रमण जारी रहेको इरानी प्रशासनले जनाएको छ। अहवाज नजिक रहेको क्यान्सर उपचारमा विशेषज्ञता प्राप्त शाहिद बाघाई अस्पताललाई सुरक्षा कारण अस्थायी रूपमा खाली गरिएको पनि जनाइएको छ।
अमेरिकाले आफ्नो कारबाही इरानको सैन्य क्षमता कमजोर पार्ने तथा क्षेत्रीय सुरक्षामाथि देखिएको खतराको जवाफ भएको दाबी गरेको छ। तर इरानले नागरिक पूर्वाधारलाई लक्षित गरी हमला गरिएको आरोप लगाएको छ।
यसैबीच इरानले बहराइन, कुवेत, सिरिया र ओमानस्थित अमेरिकी सैन्य अड्डाहरूलाई लक्षित गर्दै जवाफी आक्रमण सुरु गरिएको दाबी गरेको छ। यस घटनापछि मध्यपूर्वको सुरक्षा अवस्था थप तनावपूर्ण बनेको छ।