बारामा प्रहरीले ९० लाख रुपैयाँ बराबरको अवैध सामानसहित दुई ट्रक नियन्त्रणमा लिएको छ।
जिल्ला प्रहरी कार्यालय बाराका अनुसार विशेष सूचनाका आधारमा प्रहरी चौकी पथलैयाबाट खटिएको टोलीले मिति २०८२ भदौ २३ गते बिहान ३:४० बजे जीतपुरसिमरा उपमहानगरपालिका–१ पथलैया चौकमा चेकजाँच गर्ने क्रममा वीरगञ्जबाट चितवनतर्फ जाँदै गरेका दुई ट्रक रोकेको थियो।
चेकजाँचका क्रममा ट्रकमा रहेको सामान बिलबिजक भन्दा फरक पाइएको र त्यसको अनुमानित मूल्य ९० लाख रुपैयाँ रहेको प्रहरीले जनाएको छ।
ना ३ ख ७९८४ नम्बरको ट्रकमा दाना, ह्वाइट सिमेन्ट, केमिकल, जुत्ता र हार्डवेयर सामग्रीलगायतका खुद्रा सामान बरामद भएको छ। यस ट्रकमा भेटिएको सामानको अनुमानित मूल्य करिब ३० लाख रुपैयाँ रहेको छ।
प्र.०३–००२ ख १२१२ नम्बरको ट्रकमा चाउचाउ, सुतकेस, मोबिल र औषधि (मेडिसिन) बरामद भएको छ। यस ट्रकमा भेटिएको सामानको अनुमानित मूल्य करिब ६० लाख रुपैयाँ रहेको छ।
दुवै ट्रक तथा बरामद सामानलाई आवश्यक कारबाहीका लागि आन्तरिक राजश्व कार्यालय, पथलैया, बारामा बुझाइएको जिल्ला प्रहरी कार्यालय बाराले जनाएको छ।
