१३ पुस, काठमाडौं।
नवौं एनभीए महिला तथा पुरुष क्लब भलिबल च्याम्पियनसिप २०८२ अन्तर्गत महिलातर्फ विभागीय टोलीहरूको प्रभावशाली प्रदर्शन जारी रहेको छ। त्रिभुवन आर्मी क्लब र एपीएफ क्लबले आइतबार लगातार दोस्रो जित हात पार्दै प्रतियोगितामा बलियो दाबेदारी प्रस्तुत गरेका छन्।
त्रिपुरेश्वरस्थित राखेप कभर्डहलमा भएको समूह ‘ए’ को पहिलो खेलमा आर्मीले कर्णाली प्रदेशको चुली युवा क्लबमाथि स्पष्ट जित दर्ता गर्यो। आर्मीले चुलीलाई २५–१६, २५–१२ र २५–९ को सोझो सेटमा पराजित गर्दै खेल पूर्ण रूपमा नियन्त्रणमा राख्यो।
यसअघि आर्मीले एभरेष्ट भलिबल क्लबलाई हराएको थियो भने चुली युवा क्लब भने प्रतियोगितामा लगातार दोस्रो हार बेहोरिरहेको छ। चुली पहिलो खेलमै न्यु डायमन्ड स्पोर्ट्स क्लबसँग पराजित भएको थियो।
यस्तै, महिलातर्फकै अर्को खेलमा एपीएफ क्लबले सुदूरपश्चिम प्रदेशविरुद्ध एकतर्फी प्रदर्शन गर्यो। एपीएफले सुदूरपश्चिमलाई २५–६, २५–११ र २५–१२ को सेटमा हराउँदै लगातार दोस्रो जित निकालेको हो।
एपीएफले यसअघि शनिबार मधेश प्रदेशको टोलीलाई पराजित गर्दै प्रतियोगिताको सुरुवात जितसहित गरेको थियो। विभागीय टोलीहरूको यो सशक्त प्रदर्शनले महिलातर्फको प्रतिस्पर्धा अझ रोमाञ्चक बन्दै गएको संकेत दिएको छ।
नवौं एनभीए क्लब भलिबल च्याम्पियनसिपअन्तर्गत आगामी दिनमा हुने खेलहरूले समूह चरणको समीकरण थप स्पष्ट पार्ने अपेक्षा गरिएको छ।
