काठमाडौं, ११ चैत । कूटनीतिक वार्ताका संकेतहरू देखिइरहेका बेला इरानले इजरायल तथा खाडी क्षेत्रतर्फ नयाँ मिसाइल आक्रमण गरेपछि मध्यपूर्वको तनाव थप चर्किएको छ ।
इरानको रिभोलुसनरी गार्ड्सले इजरायलतर्फ मिसाइलको नयाँ लहर प्रहार गरेको जनाएको छ । साथै कुवेत, जोर्डन र बहराइनमा रहेका अमेरिकी सैन्य अड्डाहरूलाई पनि लक्षित गरिएको बताइएको छ । इरानले यी आक्रमणलाई अमेरिका र इजरायलका कारबाहीको जवाफका रूपमा प्रस्तुत गरेको छ ।
आक्रमणको प्रभाव खाडी क्षेत्रमा समेत देखिएको छ । कुवेतमा ड्रोन आक्रमणपछि इन्धन ट्याङ्कीमा आगलागी भएको छ भने बहराइनमा हवाई आक्रमणको साइरन बजाइएको छ । जोर्डनको राजधानी अम्मान आसपास छर्रा खसेको रिपोर्ट भए पनि ठूलो क्षति नभएको जनाइएको छ । साउदी अरेबियाले आफ्नो पूर्वी क्षेत्रमा चारवटा ड्रोन खसालेको जनाएको छ ।
उता इजरायलले पनि इरानसँग सम्बन्धित पूर्वाधारमाथि थप आक्रमण सुरु गरेको जनाएको छ । इरानले भने बुसेहरस्थित नागरिक आणविक केन्द्रमा इजरायलले दोस्रोपटक आक्रमण गरेको आरोप लगाएको छ ।
यसैबीच अमेरिकी राष्ट्रपति डोनाल्ड ट्रम्पले इरानसँग वार्ताको प्रक्रिया अघि बढिरहेको संकेत दिएका छन् । उनले अमेरिका र इरानबीच संवाद भइरहेको दाबी गरे पनि इरानले त्यसको औपचारिक पुष्टि गरेको छैन ।
ट्रम्पले पछिल्ला घटनाक्रमलाई सकारात्मक संकेतका रूपमा व्याख्या गर्दै दुवै पक्षबीच सम्भावित सहमतिको ढोका खुला रहेको बताएका छन् ।
युद्ध र कूटनीति सँगसँगै अघि बढिरहेको यो द्वन्द्वले क्षेत्रीय सुरक्षा अवस्था थप जटिल बनाएको विश्लेषण गरिएको छ ।
