कुशलको विस्फोटक शतकमा अमेरिका पराजित, नेपालको शानदार पुनरागमन

काठमाडौं, जेठ २ : ओपनर कुशल भुर्तेलको उत्कृष्ट शतकीय इनिङ्समा नेपालले आईसीसी विश्वकप क्रिकेट लिग–२ अन्तर्गत अमेरिकामाथि ९ विकेटको प्रभावशाली जित निकालेको छ।
त्रिवि क्रिकेट मैदानमा अमेरिकाले दिएको १९६ रनको लक्ष्य नेपालले ३६.४ ओभरमा एक विकेट गुमाएर सहज रूपमा पूरा गर्‍यो। जितका नायक बनेका कुशल भुर्तेल ११७ बलमा १२० रन बनाउँदै अविजित रहे। उनले १३ चौका र ४ छक्का प्रहार गर्दै अमेरिकी बलिङ आक्रमणमाथि दबाब बनाए।
कुशलले आसिफ शेखसँग पहिलो विकेटका लागि १४५ रनको उत्कृष्ट साझेदारी गरे। आसिफले ७२ बलमा ५९ रन बनाए भने इसान पाण्डे १६ रनमा अविजित रहे। अमेरिकाका लागि मोहम्मद मोहसिनले एक मात्र विकेट लिए।
यसअघि टस जितेर ब्याटिङ गरेको अमेरिका ४३.३ ओभरमा १९५ रनमै समेटिएको थियो। अमेरिकाका लागि स्मित पटेलले सर्वाधिक ८४ रन बनाए भने शेहान जयसुरियाले ५० रनको योगदान दिए। दुवैले दोस्रो विकेटका लागि शतकीय साझेदारी गर्दै टोलीलाई बलियो अवस्थामा पुर्‍याएका थिए।
तर त्यसपछि नेपाली बलरहरू खेलमा हाबी भए। उपकप्तान दीपेन्द्रसिंह ऐरीले महत्वपूर्ण समयमा विकेट निकाल्दै अमेरिकाको मध्यक्रम धराशायी बनाए। उनले ४ विकेट लिए भने सोमपाल कामीले २ विकेट हात पारे। सन्दीप लामिछाने र गुल्सन झाले पनि एक–एक विकेट लिए।
यो जितसँगै नेपालले लिग–२ मा महत्वपूर्ण अंक जोडेको छ। नेपालले अब आफ्नो तेस्रो खेल सोमबार स्कटल्याण्डसँग खेल्नेछ।