इउस्टाकियोको अन्तिम प्रहारमा क्यानडाको विश्वकप यात्रा थपियो, अन्तिम १६ मा प्रवेश

काठमाडौं । फिफा विश्वकप २०२६ मा क्यानडाले दक्षिण अफ्रिकालाई पराजित गर्दै नकआउट चरणमा स्थान बनाएको छ। निकै प्रतिस्पर्धात्मक खेलमा स्टेफन इउस्टाकियोले खेलको अन्तिम समयमा गरेको गोल नै क्यानडाको जितको कारण बन्यो।
लस एन्जलसमा भएको खेलको सुरुवातदेखि नै दुवै टोलीले आक्रमक र प्रतिस्पर्धात्मक प्रदर्शन गरेका थिए। दक्षिण अफ्रिकाले पहिलो हाफमा केही राम्रा अवसर सिर्जना गरे पनि गोलमा परिणत गर्न सकेन।
क्यानडाले पनि पहिलो हाफमै अग्रता लिने मौका पाएको थियो। मोइस बोम्बिटोको हेडर गोललाइनबाट रोकिएको थियो भने ताजोन बुखाननको प्रहार दक्षिण अफ्रिकी गोलरक्षक रोनवेन विलियम्सले शानदार ढंगले बचाएका थिए।
दोस्रो हाफमा क्यानडाले खेलमा आफ्नो नियन्त्रण बढाउँदै लग्यो। तर निर्धारित समय सकिन लाग्दासम्म दुवै टोलीबाट गोल हुन सकेन।
निर्णायक क्षण अतिरिक्त समयको ९०+२ मिनेटमा आयो। इउस्टाकियोले डिबक्स नजिकैबाट उत्कृष्ट प्रहार गर्दै बललाई गोलपोस्टको तल्लो कुनामा पुर्‍याए। उनको सोही गोल क्यानडाका लागि ऐतिहासिक जित बन्न पुग्यो।
जितसँगै क्यानडा विश्वकपको अन्तिम १६ मा पुगेको छ। अब उसले नेदरल्यान्ड्स र मोरक्कोबीचको खेलको विजेतासँग प्रतिस्पर्धा गर्नेछ।
दक्षिण अफ्रिका प्रतियोगिताबाट बाहिरिए पनि पहिलो पटक विश्वकपको नकआउट चरणमा पुग्दै इतिहास बनाउन सफल भएको छ। यस्तै उसका प्रशिक्षक ह्युगो ब्रोसले ७४ वर्ष ७९ दिनको उमेरमा विश्वकप नकआउट चरणमा टोली नेतृत्व गर्ने सबैभन्दा उमेरदार प्रशिक्षकको कीर्तिमान बनाएका छन्।