काठमाडौं, असोज ५ । रुसमा सम्पन्न संसदीय निर्वाचनको प्रारम्भिक मतपरिणाममा राष्ट्रपति भ्लादिमिर पुटिनसमर्थित सत्तारूढ दल युनाइटेड रसिया अगाडि देखिएको छ।
रुसको केन्द्रीय निर्वाचन आयोगका अनुसार करिब ५८ प्रतिशत मतदान केन्द्रको मतगणना सकिँदासम्म समानुपातिक प्रणालीअन्तर्गत युनाइटेड रसियाले करिब ५८ प्रतिशत मत प्राप्त गरेको छ।
रुसको संसद्को तल्लो सदन स्टेट ड्युमाका कुल ४५० सिटमध्ये २२५ सिट समानुपातिक प्रणाली र बाँकी २२५ सिट प्रत्यक्ष निर्वाचन क्षेत्रबाट चयन हुने व्यवस्था छ। प्रारम्भिक परिणामअनुसार प्रत्यक्षतर्फ पनि युनाइटेड रसियाका उम्मेदवारहरू अधिकांश क्षेत्रमा अगाडि देखिएका छन्।
निर्वाचनका क्रममा पुटिनका नीतिको विरोध गर्ने प्रमुख विपक्षी शक्तिहरूको सहभागिता निकै सीमित रहेको थियो। अधिकांश विपक्षीलाई उम्मेदवारी दिनबाट रोकिएको अवस्थामा निर्वाचन सम्पन्न भएको बताइएको छ।
युक्रेनसँगको युद्धपछि रुसले नियन्त्रणमा लिएको दाबी गरेका चार युक्रेनी क्षेत्रका साथै सन् २०१४ मा रुसले कब्जा गरेको क्रिमियामा पनि मतदान गराइएको थियो। युक्रेनले ती क्षेत्रमा निर्वाचन गराइएकोप्रति आपत्ति जनाउँदै त्यसलाई गैरकानुनी भनेको छ। युरोपेली संघले पनि उक्त निर्वाचनलाई अन्तर्राष्ट्रिय कानुनविपरीत भएको बताएको छ।
पुटिनको समर्थन रहेको युनाइटेड रसियाको प्रारम्भिक चुनावी सफलताले क्रेमलिनको राजनीतिक प्रभावलाई थप बलियो बनाउने देखिएको छ।
निर्वाचनको प्रारम्भिक परिणामअनुसार क्रेमलिनका नीतिलाई प्रायः समर्थन गर्ने अन्य चार दल पनि संसद्को तल्लो सदनमा पुनः प्रवेश गर्ने अवस्थामा देखिएका छन्।
यो निर्वाचन सोभियत संघ विघटनपछिको अवधिमै राजनीतिक प्रतिस्पर्धा र अभिव्यक्ति स्वतन्त्रतामाथि कडा प्रतिबन्ध रहेको अवस्थामा सम्पन्न भएको बताइएको छ। यद्यपि अन्तिम मतपरिणाम सार्वजनिक भएपछि मात्रै दलहरूले प्राप्त गर्ने वास्तविक सिट संख्या स्पष्ट हुनेछ।
