वीरगञ्ज, असोज ११ । वीरगञ्ज महानगरपालिकाको आगामी नेतृत्वलाई लिएर स्थानीयस्तरमा छलफल बढिरहेका बेला विकास तथा प्राविधिक क्षेत्रमा लामो अनुभव भएका इन्जिनियर मनोजकुमार गुप्ताको नाम सम्भावित नेतृत्वका रूपमा चर्चामा आएको छ।
वीरगञ्जका विभिन्न बौद्धिक, प्राविधिक तथा पेशागत क्षेत्रका व्यक्तिहरूले महानगरको प्रमुख पदमा गुप्तालाई अघि बढ्न आग्रह गरेको बताइएको छ। उनीहरूले महानगरका विद्यमान सहरी समस्या समाधानका लागि प्राविधिक ज्ञान, परियोजना सञ्चालन तथा विकास साझेदारसँग सहकार्य गर्न सक्ने नेतृत्व आवश्यक रहेको धारणा राखेका छन्।
गुप्ताको नाम चर्चामा आएसँगै वीरगञ्जका सडक, ढल तथा डुबान, फोहोर व्यवस्थापन, पार्किङ, यातायात, वातावरण, स्वास्थ्य, शिक्षा, रोजगारी र डिजिटल सार्वजनिक सेवाजस्ता विषयमा बहससमेत केन्द्रित हुन थालेको छ।
गुप्ताले वीरगञ्जको विकासलाई केवल सडक, भवन र अन्य भौतिक संरचना निर्माणमा सीमित गर्न नहुने धारणा राख्दै नागरिकको दैनिक जीवनमा प्रत्यक्ष सुधार ल्याउने योजनालाई प्राथमिकता दिनुपर्ने बताउँदै आएका छन्।
विकासलाई केन्द्रमा राखेर बहस गर्नुपर्ने धारणा
नेपाली कांग्रेस निकट श्याम पोखरेलले गुप्ताले राजनीतिक पहिचानभन्दा आफ्नो व्यावसायिक कामलाई प्राथमिकता दिएको आफूले पाएको बताएका छन्। उनका अनुसार गुप्ताको सम्भावित सक्रियताले वीरगञ्जको विकासका विषयमा नयाँ बहस सिर्जना गर्न सक्छ।
समाजवादी पार्टी पर्साका अध्यक्ष रामनरेश यादवले गुप्ता गरिबी निवारण कोषको परियोजना प्रमुखका रूपमा पर्सामा कार्यरत रहँदा न्यून आय भएका समुदायको जीवनस्तर सुधारका कार्यक्रमसँग जोडिएको स्मरण गरेका छन्।
यादवका अनुसार जगरनाथपुर क्षेत्रमा स्थानीय स्रोतको प्रयोग गर्दै ग्यासिफायर प्लान्ट सञ्चालन तथा वैकल्पिक ऊर्जासम्बन्धी कार्यक्रम अघि बढाउन गुप्ताले भूमिका निर्वाह गरेका थिए।
नेकपा एमालेका नेता ज्वाला साहले स्थानीय स्रोत, सीप र प्रविधिमा आधारित उद्योगमार्फत रोजगारी सिर्जना गर्ने गुप्ताको अवधारणालाई वीरगञ्जको औद्योगिक विकाससँग जोड्न सकिने बताएका छन्।
त्यस्तै, पत्रकार छट्ठु साहले पर्सामा कार्यक्रम प्रमुखका रूपमा कार्यरत रहँदा गुप्ताले समुदाय परिचालन र वातावरण संरक्षणसँग सम्बन्धित गतिविधिमा काम गरेको स्मरण गरेका छन्।
फोहोर र डुबान समाधानमा दीर्घकालीन योजना
गुप्ताले वीरगञ्जका प्रमुख चुनौतीमध्ये फोहोर व्यवस्थापन र वर्षायाममा हुने डुबानलाई प्राथमिकताका साथ सम्बोधन गर्नुपर्ने बताउँदै आएका छन्।
उनले घरबाटै फोहोर छुट्याउने, पुनःप्रयोग तथा प्रशोधन गर्ने र जैविक फोहोरलाई उपयोगी वस्तुमा परिणत गर्ने गरी एकीकृत फोहोर व्यवस्थापन प्रणाली आवश्यक रहेको बताएका छन्।
त्यसैगरी, डुबान नियन्त्रणका लागि सडक र ढललाई छुट्टाछुट्टै योजनाका रूपमा अघि बढाउनुको सट्टा सम्पूर्ण जलनिकास प्रणालीको अध्ययन गरी दीर्घकालीन पूर्वाधार योजना बनाउनुपर्ने उनको धारणा छ।
पार्किङ व्यवस्थापन, यातायात प्रणाली सुधार, सार्वजनिक स्थानको संरक्षण र अव्यवस्थित सहरीकरण नियन्त्रणलाई पनि महानगरको दीर्घकालीन योजनामा समेट्नुपर्ने उनले बताएका छन्।
औद्योगिक सम्भावनालाई रोजगारीसँग जोड्ने प्रस्ताव
औद्योगिक तथा व्यापारिक केन्द्रका रूपमा रहेको वीरगञ्जको सम्भावनाबाट स्थानीय युवाले रोजगारी र उद्यमशीलताको अवसर पाउनुपर्ने गुप्ताको धारणा छ।
स्टार्टअप प्रवर्द्धन, सीप विकास, स्थानीय उत्पादन, निजी क्षेत्रसँग सहकार्य तथा सार्वजनिक–निजी साझेदारीमार्फत रोजगारीका अवसर विस्तार गर्न सकिने उनले बताएका छन्।
स्थानीय उत्पादनलाई बजारसँग जोड्ने, युवाको सीप विकास गर्ने तथा लगानी र उद्यम सञ्चालनका लागि महानगरबाट आवश्यक सहजीकरण गर्न सके रोजगारीका लागि बाहिरिनुपर्ने बाध्यता कम गर्न सकिने उनको भनाइ छ।
डिजिटल प्रणालीबाट सेवा प्रवाह सुधार गर्ने योजना
महानगरपालिकाबाट सेवा लिँदा नागरिकले भोग्नुपर्ने प्रशासनिक झन्झट घटाउन सार्वजनिक सेवामा डिजिटल प्रणाली विस्तार गर्नुपर्ने प्रस्ताव पनि गुप्ताले अघि सारेका छन्।
सेवाका लागि दिएको निवेदनको अवस्था, प्रक्रिया र लाग्ने समयबारे नागरिकले अनलाइनबाटै जानकारी पाउने व्यवस्था गर्नुपर्ने उनको धारणा छ। साथै महानगरका योजना, बजेट तथा खर्चको अनुगमनमा नागरिकको पहुँच बढाउने प्रणाली विकास गर्नुपर्ने उनले बताएका छन्।
विकास क्षेत्रमा लामो अनुभव
गुप्ताले विश्व बैंक तथा संयुक्त राष्ट्रसंघसम्बद्ध पहललगायत अन्तर्राष्ट्रिय विकास संस्थामा १७ वर्षभन्दा बढी काम गरेको विवरण सार्वजनिक गरेका छन्।
परियोजना व्यवस्थापन, सरोकारवालासँगको समन्वय, नीतिगत संवाद, वातावरण, नवीकरणीय ऊर्जा तथा अन्तर्राष्ट्रिय विकास साझेदारसँगको सहकार्य उनका अनुभवका प्रमुख क्षेत्र रहेको बताइएको छ।
वातावरण र हरित प्रविधिको क्षेत्रमा समेत काम गरेका गुप्ताले हस्क पावर नेपाल प्रालिमार्फत स्वच्छ चुलो, ग्यासिफायर चुलो, बायो–पेन्ट र हस्क पेलेटलगायतका क्षेत्रमा काम गरेको विवरण सार्वजनिक गरेका छन्।
उम्मेदवारीबारे भने औपचारिक घोषणा छैन
गुप्ताले नगर प्रमुखको जिम्मेवारीलाई व्यक्तिगत प्रतिष्ठा वा राजनीतिक परिचय निर्माण गर्ने माध्यमभन्दा सार्वजनिक सेवाको जिम्मेवारीका रूपमा लिनुपर्ने धारणा राखेका छन्।
महानगरका जटिल समस्या समाधान गर्न एउटै व्यक्तिको प्रयास पर्याप्त नहुने भन्दै उनले राजनीतिक तथा प्रशासनिक संयन्त्रबीच प्रभावकारी समन्वय, स्पष्ट योजना, समयसीमा र निरन्तर कार्यान्वयन आवश्यक रहेको बताएका छन्।
निर्वाचित भएमा पहिलो सय दिन, पहिलो वर्ष र पाँच वर्षमा गर्ने कामको प्राथमिकता नागरिकसमक्ष स्पष्ट रूपमा प्रस्तुत गर्नुपर्ने उनको प्रस्ताव छ।
यद्यपि गुप्ताले वीरगञ्ज महानगरपालिकाको नगर प्रमुख पदमा उम्मेदवारी दिने औपचारिक घोषणा गरिसकेका छैनन्। निर्वाचनमा सहभागी हुने तथा राजनीतिक सहकार्य गर्ने विषयमा अन्तिम निर्णय हुन बाँकी रहेकाले उनको नाम हाल सम्भावित उम्मेदवारका रूपमा मात्रै चर्चामा रहेको छ।
गुप्ताको नाम चर्चामा आएपछि वीरगञ्जको स्थानीय नेतृत्वसम्बन्धी बहसमा सहरी पूर्वाधारसँगै वातावरण, प्रविधि, रोजगारी, फोहोर व्यवस्थापन र सार्वजनिक सेवा सुधारका विषयले समेत स्थान पाएका छन्।
