काठमाडौं, कात्तिक ८-अमेरिकी राष्ट्रपति डोनाल्ड ट्रम्पले इरानसँग सहमति हुन नसके पुनः सैन्य कारबाही अघि बढाउन सक्ने चेतावनी दिएका छन्।
उनले इरानसँग वार्तामार्फत सम्झौता गर्ने सम्भावना खुला राख्दै सहमति नभए यसअघि सञ्चालन गरिएको ‘एपिक फ्युरी’ जस्तै अर्को सैन्य अभियान चलाउन सकिने बताएका हुन्।
शुक्रबार फ्लोरिडामा आयोजित एक चुनावी सभालाई सम्बोधन गर्दै ट्रम्पले इरानले समझदारी देखाएर वार्ताका लागि गम्भीर प्रस्ताव ल्याउनुपर्ने बताए। तर, इरानले त्यस्तो प्रस्ताव अघि सार्नेमा आफूलाई शङ्का रहेको उनको भनाइ थियो।
ट्रम्पले इरानको अर्थतन्त्र कमजोर अवस्थामा रहेको दाबी गर्दै अमेरिकी आक्रमणका कारण इरानले ठूलो क्षति बेहोरेको जिकिर गरे। उनले इरानमाथि दबाब कायम राख्दै वार्ताबाट समाधान खोज्ने विकल्प पनि खुला रहेको सङ्केत दिएका छन्।
यसअघि शुक्रबार नै ट्रम्पले अमेरिका र इरानबीचको युद्ध छिट्टै अन्त्य हुन सक्ने बताएका थिए। यद्यपि, द्वन्द्व तत्काल अन्त्य गर्ने प्रयास गर्नु उपयुक्त हुने वा समयसँगै त्यसलाई मत्थर हुन दिनुपर्ने भन्ने विषयमा उनले प्रश्न उठाएका थिए।
ट्रम्पको पछिल्लो अभिव्यक्तिले इरानसँग सम्झौता गर्ने प्रयास र सैन्य कारबाहीको विकल्पलाई सँगसँगै अघि बढाउने अमेरिकी दृष्टिकोण देखाएको छ। अब दुवै देशबीच वार्ताको सम्भावना कस्तो दिशामा अघि बढ्छ भन्ने विषय आगामी कूटनीतिक पहल र दुवै पक्षको प्रतिक्रियामा निर्भर रहनेछ।
