ढाका, २५ कात्तिक। बंगलादेशकी पूर्वप्रधानमन्त्री शेख हसिना स्वदेश फर्किएमा उनलाई मृत्युदण्ड दिइने त्यहाँका प्रमुख सरकारी वकिल मोहम्मद अमिनुल इस्लामले चेतावनी दिएका छन्।
हसिना स्वदेश फर्कने तयारीमा रहेको चर्चा भइरहेका बेला सरकारी वकिलको यस्तो अभिव्यक्ति आएको हो।
मंगलबार सञ्चारमाध्यमसँग कुरा गर्दै इस्लामले गम्भीर अपराधमा दोषी ठहर भएकी हसिनाका लागि अब कुनै विकल्प बाँकी नरहेको बताएका छन्। उनले दोषी ठहर भएका व्यक्तिलाई नयाँ पासपोर्ट वा राष्ट्रिय परिचयपत्र उपलब्ध गराउन नसकिने पनि स्पष्ट पारेका छन्।
हसिनाका कानुनी प्रतिनिधिहरूले नोभेम्बर ९ मा भारतको नयाँदिल्लीस्थित बंगलादेशी उच्चायोगलाई इमेल पठाउँदै नयाँ पासपोर्ट र राष्ट्रिय परिचयपत्र जारी गर्न माग गरेका थिए। तर बंगलादेश सरकारले उक्त माग अस्वीकार गरेको छ।
सन् २०२४ को विद्यार्थी आन्दोलन दमन गरेको आरोपमा बंगलादेशको अदालतले नोभेम्बर २०२५ मा हसिनालाई मृत्युदण्डको सजाय सुनाएको थियो। तर हसिनाले आफूमाथि लगाइएका आरोप अस्वीकार गर्दै अदालतको फैसलालाई राजनीतिक प्रतिशोधका रूपमा व्याख्या गर्दै आएकी छन्।
भारतसँग हसिनाको सुपुर्दगी माग
बंगलादेश सरकारले यसअघि नै भारतसँग शेख हसिनालाई स्वदेश फिर्ता पठाउन आग्रह गरिसकेको छ। हसिना भारतमा बस्दै आएकी छन्। उनको सुपुर्दगीको विषयलाई लिएर दुई देशबीचको सम्बन्धमा तनाव कायम छ।
भारतीय विदेश मन्त्रालयले भने हसिनाको सुपुर्दगीको विषयलाई प्राविधिक प्रक्रियासँग जोडिएको विषयका रूपमा व्याख्या गरेको छ।
बंगलादेश सरकार हसिना फर्किएको चाहँदैन : पूर्व भारतीय कूटनीतिज्ञ
भारतकी पूर्वकूटनीतिज्ञ वीणा सिक्रीले शेख हसिनाले बंगलादेश फर्किएर अदालतको सामना गर्न आफू तयार रहेको बताइसकेको उल्लेख गरेकी छन्।
उनका अनुसार पासपोर्ट रद्द भइसकेपछि यात्रा अनुमतिपत्रका लागि आवेदन दिनु स्वाभाविक कदम हो। तर बंगलादेश सरकारको प्रतिक्रिया आश्चर्यजनक रहेको उनको भनाइ छ।
सिक्रीले बंगलादेशका विदेश राज्यमन्त्री हुमायुन कबीरले समेत भारतसँग हसिनाको सुपुर्दगी माग दोहोर्याइरहेको उल्लेख गर्दै सरकार स्वयं हसिना स्वदेश फर्किएको चाहँदैन भन्ने देखिएको बताएकी छन्।
डिसेम्बरमा स्वदेश फर्कने हसिनाको तयारी
शेख हसिनाले आगामी डिसेम्बरमा बंगलादेश फर्कने इच्छा पटक-पटक व्यक्त गर्दै आएकी छन्। एएफपीसँगको अन्तर्वार्तामा उनले स्वदेश फर्किए आफूलाई मृत्युदण्ड हुन सक्ने जानकारी भए पनि जनताप्रतिको जिम्मेवारीबाट पछि नहट्ने बताएकी थिइन्।
उनले आफ्नो राजनीतिक निर्णय डरका आधारमा परिवर्तन नगर्ने पनि स्पष्ट पारेकी छन्।
के थियो सन् २०२४ को विद्यार्थी आन्दोलन?
बंगलादेशमा सन् २०२४ को जुन महिनामा सरकारी जागिरमा आरक्षणको विरोध गर्दै विद्यार्थी आन्दोलन सुरु भएको थियो। अदालतले सन् १९७१ को स्वतन्त्रता संग्राममा सहभागी भएका स्वतन्त्रता सेनानीका सन्तान तथा नातिनातिनालाई सरकारी जागिरमा ३० प्रतिशत आरक्षण दिने फैसला गरेपछि विद्यार्थीहरू विरोधमा उत्रिएका थिए।
विद्यार्थीहरूले आरक्षणको सट्टा योग्यताका आधारमा सरकारी जागिरमा भर्ना गर्नुपर्ने माग राखेका थिए। जुलाईमा आन्दोलन थप चर्किएपछि प्रहरी र प्रदर्शनकारीबीच हिंसात्मक झडप भएका थिए। प्रदर्शनकारीमाथि प्रहरीले गोली चलाएको र अत्यधिक बल प्रयोग गरेको आरोपसमेत लागेको थियो।
आन्दोलन विस्तार हुँदै गएपछि विद्यार्थीहरूले प्रधानमन्त्री हसिनाको राजीनामा माग्न थाले। अन्ततः सन् २०२४ अगस्ट ५ मा हजारौँ प्रदर्शनकारी राजधानी ढाकातर्फ अघि बढ्दै हसिनाको सरकारी निवाससम्म पुगेका थिए।
त्यसपछि शेख हसिना सैन्य विमानमार्फत भारत पुगेकी थिइन्। उनी त्यसयता भारतमै बस्दै आएकी छन्।
