काठमाडौं, २७ कात्तिक। नेपाल प्रिमियर लिग (एनपीएल) अन्तर्गत शुक्रबार भएको खेलमा चितवन राइनोजले जनकपुर बोल्ट्सलाई ४ विकेटले पराजित गर्दै प्लेअफ प्रवेशको सम्भावना बलियो बनाएको छ। चितवनको जितसँगै जनकपुर बोल्ट्स र कर्णाली याक्स भने प्लेअफ दौडबाट बाहिरिएका छन्।
कीर्तिपुरस्थित त्रिवि क्रिकेट मैदानमा जनकपुरले दिएको ८९ रनको सामान्य लक्ष्य चितवनले १७.२ ओभरमा ६ विकेट गुमाएर ९२ रन बनाउँदै पूरा गर्यो।
जितसँगै चितवनले ६ खेलबाट ७ अंक जोड्दै अंकतालिकाको चौथो स्थानमा उक्लिएको छ। चितवनले लिग चरणको अन्तिम खेल आइतबार कर्णाली याक्ससँग खेल्नेछ। शनिबार विराटनगर किंग्स लुम्बिनी लायन्ससँग पराजित भए चितवनले अन्तिम खेलअघि नै प्लेअफमा स्थान सुरक्षित गर्नेछ। विराटनगर विजयी भए चितवनले कर्णालीविरुद्ध जित निकाल्नुपर्नेछ।
यस हारसँगै जनकपुरले सात खेलबाट दुई जितसहित चार अंक मात्र जोड्न सक्यो। एक खेल खेल्न बाँकी रहेको कर्णालीको पनि चार अंक छ। अन्तिम खेल जिते पनि शीर्ष चारमा पुग्ने सम्भावना नरहेपछि दुवै टोली प्लेअफ दौडबाट बाहिरिएका हुन्।
चितवनको जितमा डाविड मलानले अविजित ३५ रन बनाए। उनले ३९ बलमा एक छक्का प्रहार गरे। कुशल मल्लले १५, रवि बोपाराले १३ र कमिल मिश्राले १२ रनको योगदान दिए।
सामान्य लक्ष्य पछ्याउने क्रममा चितवनले सुरुवातमै दबाब सामना गर्नुपरेको थियो। ओपनर अर्जुन साउद दोस्रो बलमै खाता नखोली आउट भए। ३७ रन बनाउँदा पाँच विकेट गुमाएको चितवनलाई डाविड मलान र कुशल मल्लले ३० रनको साझेदारी गर्दै सम्हालेका थिए।
बलिङतर्फ जनकपुरका राहुल यादवले तीन विकेट लिए भने ललित राजवंशीले दुई र विशाल सुशलिङले एक विकेट हात पारे।
त्यसअघि टस जितेर पहिले ब्याटिङ गरेको जनकपुर बोल्ट्सले निर्धारित २० ओभरमा नौ विकेट गुमाउँदै ८८ रन बनाएको थियो।
चितवनका स्पिनर रन्जित कुमार र कप्तान सिकन्दर राजाको प्रभावशाली बलिङसामु जनकपुरका ब्याटर टिक्न सकेनन्। जनकपुरका कप्तान हर्मीत सिंहले सर्वाधिक २४ रन बनाए। उनले २४ बलमा दुई चौका र एक छक्का प्रहार गरे। विशाल सुशलिङले १५ रन जोडे।
जनकपुरका ओपनर तृतराज दास पाँच रन बनाएर आउट भएपछि विकेट पतनको क्रम रोकिएन। सन्तोष कार्कीले १०, रायन बर्लले ६, आदित्य महताले चार र अभिषेक तिवारीले चार रन बनाए। ह्यारी टेक्टर खाता नखोली आउट भए। राहुल यादव १० रनमा अविजित रहे।
चितवनका लागि रन्जित कुमारले तीन ओभरमा एक मेडन राख्दै दुई रन खर्चेर तीन विकेट लिए। कप्तान सिकन्दर राजाले चार ओभरमा दुई मेडन राख्दै १० रन खर्चेर दुई विकेट हात पारे। कमिल मिश्राले पनि दुई विकेट लिए। कमल सिंह ऐरी र रिजन ढकालले एक–एक विकेट लिए।
चितवनको यस जितले प्लेअफ समीकरणमा महत्वपूर्ण परिवर्तन ल्याएको छ। जनकपुर र कर्णालीको यात्रा समाप्त हुँदा चितवन भने अन्तिम खेलबाट प्लेअफमा आफ्नो स्थान सुनिश्चित गर्ने अवस्थामा पुगेको छ।
