काठमाडौं, माघ ८ — काठमाडौंमा जारी आईसीसी महिला टी–२० विश्वकप ग्लोबल छनोटमा नेपाली महिला क्रिकेट टोली आज महत्त्वपूर्ण चुनौती सामना गर्दैछ । समूह ‘बी’ अन्तर्गत नेपालले आज बिहान त्रिवि क्रिकेट मैदानमा नेदरल्यान्ड्ससँग आफ्नो दोस्रो खेल खेल्न लागेको हो । खेल बिहान ९ बजे सुरु हुनेछ ।
प्रतियोगिताको पहिलो खेलमा थाइल्यान्डसँग पराजित भएपछि नेपाल दबाबको अवस्थामा छ । अब समूह चरणबाट अगाडि बढ्नका लागि बाँकी तीन खेलमध्ये कम्तीमा दुई खेल जित्नै पर्ने बाध्यता रहेको छ । त्यसैले नेदरल्यान्ड्सविरुद्धको खेल नेपाली टोलीका लागि निर्णायक मानिएको छ ।
यसअघिका नतिजा नेपालका लागि सहज छैनन् । महिला टी–२०आई वरियतामा १४औँ स्थानमा रहेको नेदरल्यान्ड्स यस प्रतियोगितामा बलियो रूपमा देखिएको छ । उसले यसअघि जिम्बाबे र स्कटल्यान्डलाई पराजित गरिसकेको छ । २१औँ स्थानमा रहेको नेपाल भने हालसम्म नेदरल्यान्ड्ससँग खेलेका तीनवटै खेलमा पराजित भएको इतिहास छ ।
यता नेदरल्यान्ड्सलाई भने अब एक जित मात्रै पनि अघिल्लो चरणमा पुग्न पर्याप्त हुनेछ । यसले खेललाई अझ प्रतिस्पर्धात्मक र रोचक बनाउने अपेक्षा गरिएको छ ।
नेपालको सम्भावित टोलीमा कप्तान रुबिना क्षेत्रीसहित इन्दु बर्मा, पूजा महतो, सम्झना खड्का, बिन्दु रावल, कविता कुँवर, रिया शर्मा, सोमु विष्ट, सीता राना मगर, काजल श्रेष्ठ, कविता जोशी, रोमा थापा, मनीषा उपाध्याय र रचना चौधरी रहेका छन् ।
घरेलु मैदान र समर्थकको साथमा नेपालले पुरानो नतिजा उल्ट्याउँदै विश्वकप यात्रालाई जीवित राख्ने लक्ष्यसहित मैदान उत्रनेछ ।
