१० चैत,तेहरान — इरानमाथि अमेरिका इजरायल युद्ध चर्किरहेको बेला अमेरिकी एफ ३५ लडाकु विमानमाथि इरानले प्रहार गरेको दाबी सार्वजनिक भएको छ तर उक्त दाबी अमेरिकाले पुष्टि गरेको छैन ।
अन्तर्राष्ट्रिय सञ्चारमाध्यमका अनुसार कम्ब्याट मिसनबाट फर्किने क्रममा उक्त जेटलाई इरानले निशाना बनाएको दाबी गरिएको हो भने इरानी सरकारी मिडियाले पनि यसलाई रिपोर्ट गरेका छन् । यदि यो दाबी सत्य भएमा एफ ३५ जस्तो स्टेल्थ लडाकु विमानमाथि युद्धका क्रममा प्रहार भएको यो पहिलो घटना हुनेछ जसले यसको अजेयताको दाबीमाथि प्रश्न उठाउनेछ । अमेरिकी सेनाको सेन्ट्रल कमाण्डका प्रवक्ता क्याप्टेन टिम हकिन्सले भने विमान सुरक्षित अवतरण भएको र पाइलटको अवस्था स्थिर रहेको बताएका छन् र घटनाको अनुसन्धान भइरहेको जनाएका छन् । यता इरानको इस्लामिक रिभोलुसनरी गार्ड कर्प्सले भने अमेरिकी विमानलाई निशाना बनाएको दाबी गरेको छ । रक्षा सम्बन्धी मिडियाहरूका अनुसार पाइलट सामान्य घाइते भएको र विमानलाई जमिनबाट प्रहार गरिएको हुनसक्ने अनुमान गरिएको छ तर यसको स्वतन्त्र पुष्टि भएको छैन । एफ ३५ विमान अमेरिकी कम्पनी लकहिड मार्टिनले निर्माण गरेको अत्याधुनिक स्टेल्थ लडाकु विमान हो जसमा उन्नत राडार प्रणाली सेन्सर र ३६० डिग्री निगरानी क्षमताजस्ता विशेषता रहेका छन् जसले यसलाई अन्य विमानभन्दा कम पत्ता लाग्ने बनाउँछ । रक्षा विज्ञहरूका अनुसार यदि यस्तो विमानमाथि सफल प्रहार भएको प्रमाणित भएमा यो आधुनिक हवाई युद्धका लागि ठूलो संकेत हुनेछ किनकि यसले स्टेल्थ प्रविधि पनि पूर्ण रूपमा अजेय नभएको देखाउनेछ । हालसम्म अमेरिकी अधिकारीहरूले यस्तो कुनै घटना पुष्टि नगरेका छन् भने राष्ट्रपति डोनाल्ड ट्रम्पले समेत अमेरिकी विमानहरू सुरक्षित रूपमा सञ्चालन भइरहेको बताएका छन् । यसअघि पनि इरानसँगको द्वन्द्वका क्रममा अमेरिकी ड्रोन र अन्य विमानहरूमा क्षति पुगेको रिपोर्ट सार्वजनिक भएका छन् तर धेरै दाबीहरू स्वतन्त्र रूपमा पुष्टि हुन सकेका छैनन् ।
