काठमाडौं, साउन ११ — विश्वकै व्यस्त तेल ढुवानी मार्गमध्ये एक मानिने होर्मुज स्ट्रेटमा समुद्री बारूदी सुरुङ (नेभल माइन) मा ठोक्किएपछि एक तेल ट्यांकरमा आगलागी भएको छ। घटनापछि मध्यपूर्वको सुरक्षा अवस्था थप तनावपूर्ण बनेको छ।
इरानी सञ्चारमाध्यमका अनुसार उक्त ट्यांकरले इरानले निर्धारण गरेको सुरक्षित समुद्री मार्ग प्रयोग नगरी वैकल्पिक मार्ग रोजेका कारण नेभल माइनमा ठोक्किएको थियो। यसअघि पनि इरानले आफूले तोकेको मार्गभन्दा बाहिरबाट यात्रा गर्ने जहाजले त्यसको जोखिम आफैं व्यहोर्नुपर्ने चेतावनी दिँदै आएको थियो।
घटनाबारे इरानी सरकारले औपचारिक प्रतिक्रिया दिएको छैन। साथै आगलागीबाट भएको क्षति वा मानवीय हताहतबारे पनि आधिकारिक पुष्टि हुन सकेको छैन।
अमेरिका–इरानबीच फेब्रुअरीदेखि सुरु भएको सैन्य तनावपछि कुनै जहाज नेभल माइनमा परेको यो पहिलो घटना भएको बताइएको छ। युद्धका क्रममा होर्मुज क्षेत्रमा समुद्री माइन बिछाइएको थियो भने युद्धविरामपछि अमेरिकी राष्ट्रपति डोनाल्ड ट्रम्पले ती माइन हटाउन निर्देशन दिएका थिए।
यसैबीच पछिल्लो २४ घण्टामा मध्यपूर्वमा थप केही महत्वपूर्ण सुरक्षा घटनाक्रम सार्वजनिक भएका छन्।
यमनका हूती विद्रोहीले साउदी अरेबियाको जजानस्थित साउदी अरामको तेल प्रशोधन केन्द्रमा तीनवटा ब्यालिस्टिक मिसाइल प्रहार गरेको दाबी गरेका छन्। उक्त रिफाइनरी साउदी अरेबियाको प्रमुख तेल प्रशोधन केन्द्रमध्ये एक हो।
त्यसैगरी, इरानको इस्लामिक रिभोलुसनरी गार्ड कर्प्स (IRGC) ले होर्मुज स्ट्रेट पार गर्न खोजिरहेका चारवटा जहाजतर्फ चेतावनीस्वरूप गोली चलाएपछि ती जहाजले आफ्नो मार्ग परिवर्तन गरेको दाबी गरेको छ।
इरान सरकारले आन्तरिक इन्धन खपत नियन्त्रण गर्न पेट्रोलियम पदार्थको मूल्य समायोजन गर्ने विषयमा समेत अध्ययन गरिरहेको जनाएको छ।
यता, अमेरिकाले शुक्रबार राति इरानमाथि कुनै नयाँ सैन्य आक्रमण नगरेको दाबी गरेको छ। यसअघि लगातार १३ रातसम्म अमेरिकी सेनाले इरानी सैन्य संरचनामाथि आक्रमण गरेको दाबी गरिएको थियो।
त्यस्तै, इरानले बहराइनस्थित अमेरिकी पाँचौं नौसैनिक बेडाको मुख्यालयलाई ड्रोन र मिसाइलमार्फत निशाना बनाएको दाबी पनि गरेको छ। उक्त आक्रमणपछि क्षेत्रमा ठूलो विस्फोट भएको खबर सार्वजनिक भएको छ।
यद्यपि, यी अधिकांश घटनाबारे स्वतन्त्र अन्तर्राष्ट्रिय स्रोतबाट पूर्ण पुष्टि हुन बाँकी रहेकाले वास्तविक क्षति र घटनाको प्रभावबारे आधिकारिक जानकारी अझै सार्वजनिक भएको छैन।
