काठमाडौं, चैत २० — पश्चिम एसियामा उत्पन्न द्वन्द्वका कारण समस्यामा परेका नेपाली नागरिकलाई लक्षित गर्दै सरकारले तीन दिनका लागि विशेष उडान सञ्चालन गर्ने भएको छ।
नेपाल एयरलाइन्सले आज काठमाडौं–दुबई उडान गर्नेछ भने भोलि दुबई–काठमाडौं र आइतबार काठमाडौं–दमाम–काठमाडौं उडान गर्ने तालिका छ।
सरकारका अनुसार उक्त उडानमार्फत स्वदेश फर्किन नपाएका तथा गन्तव्य मुलुक जान नपाएका नेपालीलाई सहजीकरण गरिनेछ।
यस निर्णयअघि परराष्ट्र मन्त्रालय, नागरिक उड्डयन मन्त्रालय, प्राधिकरण र नेपाल एयरलाइन्सका अधिकारीबीच छलफल भएको थियो। परराष्ट्रमन्त्री शिशिर खनालको निर्देशनपछि विशेष उडानको व्यवस्था गरिएको हो।
पश्चिम एसियामा बढ्दो असुरक्षाका कारण नियमित उडान फेब्रुअरी २८ देखि बन्द छन्।
