इरानको दाबी: ‘बंकर बस्टर’सहित अमेरिकी–इजरायली हजारौं हतियार नियन्त्रणमा

काठमाडौं, वैशाख १४ — इस्लामिक रिभोलुसनरी गार्ड कर्प्स (आईआरजीसी) ले हालैका हवाई आक्रमणपछि विस्फोट नभएका अमेरिकी तथा इजरायली हतियार ठूलो संख्यामा नियन्त्रणमा लिएको दाबी गरेको छ।
इरानको सरकारी सञ्चारमाध्यम प्रेस टिभीका अनुसार सन् २०२५–२०२६ बीचको द्वन्द्वका क्रममा खसालिएका तर विस्फोट नभएका अत्याधुनिक हतियारहरू आईआरजीसीले संकलन गरेको हो।
होर्मोजगान प्रान्त अन्तर्गत बन्दर अब्बासस्थित इमाम सज्जाद कर्प्सले १५ भन्दा बढी भारी मिसाइल निष्क्रिय पारेको जनाएको छ। ती मिसाइलहरूलाई प्राविधिक अध्ययन तथा अनुसन्धानका लागि सम्बन्धित इकाइमा पठाइएको बताइएको छ।
त्यस्तै, जञ्जान प्रान्तमा रहेको अन्सार अल–महदी कर्प्सले करिब ९ हजार ५०० भन्दा बढी साना बम बरामद गरेको जनाएको छ। तीमध्ये धेरैजसो क्लस्टर हतियार प्रणालीमार्फत खसालिएका बमहरू रहेका छन्।
सबैभन्दा उल्लेखनीय रूपमा जीबीयू–५७ ‘बंकर बस्टर’ बम पनि सुरक्षित रूपमा नियन्त्रणमा लिइएको दाबी गरिएको छ। भूमिगत संरचना ध्वस्त पार्न प्रयोग हुने यस प्रकारका बम अत्याधुनिक मानिन्छन्। साथै एफ–१५, एफ–१६ र एफ–३५ विमानबाट प्रहार गरिएका विभिन्न मिसाइल र रकेटहरू पनि बरामद गरिएको जनाइएको छ।
रिभर्स इन्जिनियरिङको तयारी
विशेषज्ञहरूका अनुसार यस्ता हतियारको ‘गाइडन्स सिस्टम’ र ‘बंकर पञ्चिङ’ प्रविधिको अध्ययनबाट इरानले आफ्ना मिसाइल प्रणाली अझ उन्नत बनाउन सक्ने सम्भावना रहेको छ। यस प्रक्रियालाई रिभर्स इन्जिनियरिङ भनिन्छ, जसअन्तर्गत उपकरणको संरचना र कार्यप्रणाली विश्लेषण गरिन्छ।
यसअघि पनि इरानले आरक्यू–१७० सेन्टिनेल र एमक्यू–९ रिपर जस्ता अमेरिकी ड्रोनको अध्ययन गरेर ‘साहेद’ र ‘मोहाजेर’ ड्रोन विकास गरिसकेको छ।
यो घटनाले क्षेत्रीय सुरक्षा सन्तुलनमा नयाँ बहस सिर्जना गरेको छ भने अमेरिका र इजरायलका लागि रणनीतिक चुनौती थपिन सक्ने विश्लेषण गरिएको छ।