आजदेखि विश्वकपको महासंग्राम, तीन देशमा ४८ टोलीको प्रतिस्पर्धा

काठमाडौं, २८ जेठ । विश्व फुटबलको सबैभन्दा प्रतिष्ठित प्रतियोगिता फिफा विश्वकप २०२६ आजदेखि सुरु हुँदैछ। अमेरिका, मेक्सिको र क्यानडाले संयुक्त रूपमा आयोजना गरेको प्रतियोगिताको उद्घाटन खेल मेक्सिकोको ऐतिहासिक एस्ताडियो एज्तेका रंगशालामा हुनेछ।
पहिलोपटक तीन राष्ट्रले संयुक्त रूपमा आयोजना गरेको विश्वकपमा ४८ टोली सहभागी हुँदैछन्। यसअघि ३२ टोली सहभागी हुने प्रतियोगितामा यस संस्करणदेखि टोली संख्या बढाइएको हो। प्रतियोगिताभर १०४ खेल खेलिनेछन्, जुन विश्वकप इतिहासकै सबैभन्दा धेरै हो।
करिब ३९ दिनसम्म चल्ने प्रतियोगिताको फाइनल जुलाई १९ मा अमेरिकाको न्यु जर्सीस्थित मेटलाइफ स्टेडियममा हुनेछ। अमेरिका, मेक्सिको र क्यानडाका १६ विभिन्न रंगशालामा खेलहरू आयोजना गरिनेछन्।
यसपटक स्पेन, फ्रान्स, अर्जेन्टिना, इङ्ल्यान्ड, ब्राजिल, जर्मनी, पोर्चुगल र नेदरल्यान्ड्सलाई उपाधि दाबेदारका रूपमा हेरिएको छ। साथै विश्व फुटबलका चर्चित खेलाडीहरूबीच उत्कृष्टताको प्रतिस्पर्धाले प्रतियोगितालाई थप आकर्षक बनाउने अपेक्षा गरिएको छ।
विशेषगरी अर्जेन्टिनाका लियोनेल मेसी र पोर्चुगलका क्रिस्टियानो रोनाल्डोको सम्भावित अन्तिम विश्वकप सहभागिताले समर्थकहरूको चासो झन् बढाएको छ। दुवै खेलाडी छैटौं पटक विश्वकप खेल्ने तयारीमा छन्, जुन आफैंमा ऐतिहासिक उपलब्धि हुनेछ।
फिफाले यस संस्करणका लागि ६५१ मिलियन डलर पुरस्कार राशि निर्धारण गरेको छ। विजेता टोलीले ५० मिलियन डलर प्राप्त गर्नेछ, जुन अघिल्लो संस्करणको तुलनामा उल्लेख्य वृद्धि हो।
विश्वभरका अर्बौं दर्शकको नजर अब एक महिनाभन्दा बढी समय फुटबलको यो महाउत्सवमा केन्द्रित रहनेछ। :::