ट्रम्पको लोकप्रियता ओरालो, दोस्रो कार्यकालकै न्यून विन्दुम

काठमाडौँ — अमेरिकी राष्ट्रपति डोनाल्ड ट्रम्पको लोकप्रियता पछिल्लो समय थप खस्किएको छ। रोयटर्स/इप्सोसले गरेको पछिल्लो सर्वेक्षणअनुसार ट्रम्पको राष्ट्रपतीय कार्यसम्पादनलाई समर्थन गर्ने अमेरिकीको संख्या ३३ प्रतिशतमा झरेको छ, जुन उनको वर्तमान कार्यकालकै सबैभन्दा न्यून हो।
सर्वेक्षणमा ६४ प्रतिशत अमेरिकीले ट्रम्पको कार्यसम्पादन अस्वीकार गरेका छन् भने ३३ प्रतिशतले मात्र अनुमोदन गरेका छन्। यस महिनाको सुरुआतमा गरिएको सर्वेक्षणमा उनको अनुमोदन दर ३५ प्रतिशत थियो।
ट्रम्पको पहिलो कार्यकालसँग तुलना गर्दा पनि पछिल्लो अनुमोदन दर निकै न्यून देखिएको छ। पहिलो कार्यकालमा सन् २०१७ को डिसेम्बरमा उनको अनुमोदन दर ३३ प्रतिशतसम्म झरेको थियो।
सर्वेक्षणले अमेरिका–इरान तनावप्रति अमेरिकी नागरिकमा बढ्दो चिन्तासमेत देखाएको छ। करिब ८० प्रतिशत अमेरिकीले अमेरिका र इरानबीचको युद्ध तथा तनाव लामो समयसम्म जारी रहनेमा आफूहरू चिन्तित रहेको बताएका छन्।
पछिल्लो सर्वेक्षणले ट्रम्पप्रतिको जनसमर्थन घटिरहेको र विदेश नीति तथा इरानसँगको तनाव अमेरिकी जनमतमा महत्वपूर्ण मुद्दा बनिरहेको संकेत गरेको छ।