बिहारमा महिलाहरू निर्णायक मतदाता बन्दै, चुनावी परिणाम मोड्न सक्छन्

बिहारमा महिलाहरू निर्णायक मतदाता बन्दै, चुनावी परिणाम मोड्न सक्छन्

२३ कात्तिक, काठमाडौं ।
बिहार विधानसभा निर्वाचन अन्तिम चरणमा पुगेको छ । पहिलो चरणमा भएको मतदानले नयाँ राजनीतिक संकेत दिएको बताइँदैछ । १२१ सिटका लागि भएको पहिलो चरणको मतदानमा ६४.६६ प्रतिशत मत खसेको छ, जुन बिहारको इतिहासमै उच्च दरको मतदान हो । विश्लेषकहरू भन्छन्, यो उच्च मतदानको अर्थ सधैं सत्ता परिवर्तन होइन, तर यसपटक महिलाहरूको सक्रिय सहभागिताले विशेष प्रभाव पार्न सक्छ ।

महिलाहरू ‘साइलेंट फोर्स’ बन्दै

यस पटक पुरुषभन्दा करिब ८ प्रतिशत बढी महिलाले मतदान गरेको तथ्यांक आएको छ । विश्लेषक यशवन्त देशमुखका अनुसार, महिलाको झुकाव स्पष्ट रूपमा नीतीशकुमारतर्फ देखिएको छ । उनले बताए, “नीतीशकुमारका साइकल योजना, छात्रवृत्ति र आत्मनिर्भरता सम्बन्धी कार्यक्रमहरूले महिलामा स्थायी भरोसा बनाएका छन् ।”

पत्रकार रुही तिवारीका अनुसार, बिहारका महिलाहरू राजनीतिक रूपमा अन्य राज्यका महिलाभन्दा पहिल्यै सचेत बनिसकेका छन् । “महिलाहरू अब केवल लाभ लिने होइनन्, सशक्त बन्न चाहन्छन्,” उनले भनिन् । उनले उदाहरण दिँदै भनिन्, “एक महिलाले भनिन्– दस हजार रुपैयाँ पाएँ भने म आफ्नो ब्युटी पार्लर खोल्छु ।”

विश्लेषकहरूको भनाइमा, यदि महिलाको समर्थनका कारण नीतीशकुमार पुनः सत्तामा फर्किए भने भारतमा पहिलोपटक निर्णायक “महिला मतदाता वर्ग” स्थापनाको आधार तयार हुनेछ ।

प्रमुख चुनावी मुद्दा

यो निर्वाचनमा रोजगारी, बसाइँसराइ र कानून व्यवस्थाको प्रश्न प्रमुख बनेको छ । धेरै युवा रोजगारीका लागि राज्यबाहिर छन्, जसले चुनावी बहसमा नयाँ दिशा दिएको छ ।
पत्रकार सर्वप्रिया सांगवानका अनुसार, “मैदानमा वास्तविक मुद्दा पार्टीहरूले जनाएका कुरा भन्दा फरक छन् । धेरै मतदाताहरू आफ्नो मत सुरक्षित रूपमा खसाल्न उत्साहित देखिन्छन् ।”

जातिवाद र नयाँ प्राथमिकता

बीबीसी हिन्दीका समाचार सम्पादक नितिन श्रीवास्तवका अनुसार, बिहारमा जातीय राजनीति अझै पनि प्रभावशाली छ, तर अब रोजगारी र विकास पनि महत्त्वपूर्ण बनेका छन् । “अन्त्यमा जातिको सवाल उठ्ने गर्छ, तर यसपटक महिला र युवा मतदाताले बहसको दिशा केही हदसम्म बदलेका छन्,” उनले भने ।

बिहारमा २५ वर्षमुनिका करिब ५८ प्रतिशत जनसंख्या छ । उनीहरू रोजगारी, अवसर र स्थिर शासन खोजिरहेका छन् । यही कारण यस निर्वाचनमा युवा र महिला मतदाता दुवै निर्णायक बन्ने अनुमान गरिएको छ ।

 बिहारमा महिलाहरू अब केवल मतदाता होइनन्, परिवर्तनको सम्भावित शक्ति बनेका छन् । उनीहरूको यही मौन तर निर्णायक हस्तक्षेपले यसपटकको चुनावी नतिजा मोड्न सक्छ भन्ने विश्लेषण बढ्दै गएको छ ।

सा.अनलाइन खबर