अर्जेन्टिनाको पाटागोनियन क्षेत्रमा १४० किमी/घन्टाको तीव्र हावा, जनजीवन प्रभावित

३ मंसिर काठमाडौ

दक्षिणी अर्जेन्टिनाको पाटागोनिया क्षेत्रमा १४० किलोमिटर प्रतिघण्टाभन्दा बढी वेगको तेज हावा चलेपछि जनजीवन प्रभावित बनेको छ। तीव्र हावाका कारण विभिन्न क्षेत्रमा व्यापक अवरोध र भौतिक क्षति भएको अधिकारीहरूले जनाएका छन्।

अर्जेन्टिनाको राष्ट्रिय मौसम विज्ञान सेवाले जोखिमका आधारमा रातो, सुन्तला र पहेँलो गरी एक श्रृंखलाबद्ध मौसम अलर्ट जारी गरेको छ। विशेषगरी चुबुट र सान्ता क्रुज प्रान्त अत्यधिक प्रभावित बनेका छन्।

सबैभन्दा धेरै असर चुबुट प्रान्तको कोमोडोरो रिभाडाभिया सहरमा परेको छ, जहाँ तेज हावाका कारण स्कूल, पसल, किनमेल मल र बैंकहरू बन्द गरिएका छन्। स्थानीय प्रशासनले असुरक्षा बढेको भन्दै बासिन्दाहरूलाई घरभित्रै सुरक्षित बस्न आग्रह गरेको छ।

हावाहुरीका कारण स्थान–स्थानमा संरचनात्मक क्षति, बिजुली आपूर्तिमा समस्या र यातायात अवरुद्ध जस्ता घटना दर्ता भएका छन्। प्रभावित क्षेत्रका तस्बिर र विवरण सार्वजनिक भैरहेका छन्।