ओमानको तटनजिक जहाजमा आक्रमण : बेपत्ता भारतीय इन्जिनियरको मृत्यु पुष्टि

काठमाडौं, असार ३२ — ओमानको तटनजिक व्यावसायिक जहाज ‘जीएफएस ग्यालेक्सी’ मा भएको आक्रमणपछि बेपत्ता भएका एक भारतीय नागरिकको मृत्यु भएको पुष्टि भएको छ। दुबईस्थित भारतीय वाणिज्य दूतावासले बुधबार यसको औपचारिक पुष्टि गरेको हो।
दूतावासका अनुसार साइप्रसको झन्डा बोकेको उक्त जहाजमा इन्जिनियरका रूपमा कार्यरत ३० वर्षीय हरामब कर्माकर आक्रमणपछि बेपत्ता भएका थिए। उनको मृत्यु भएको पुष्टि भएसँगै दूतावासले मृतकका परिवारसँग निरन्तर सम्पर्कमा रही आवश्यक सहयोगका लागि यूएईका सम्बन्धित निकाय र जहाज कम्पनीसँग समन्वय गरिरहेको जनाएको छ।
गत आइतबार ओमानको तटनजिक जहाजमाथि आक्रमण भएको थियो। साइप्रसका अधिकारीहरूका अनुसार जहाजमा ११ भारतीयसहित २४ जना चालक दलका सदस्य सवार थिए। प्रारम्भिक विवरणअनुसार जहाजलाई अज्ञात प्रक्षेपणास्त्रले प्रहार गरेको थियो।
यसैबीच इरानले भने आफ्ना चेतावनीलाई बेवास्ता गर्दै जहाजले मार्ग परिवर्तन नगरेकाले आक्रमण गरिएको दाबी गरेको छ। घटनाबारे थप अनुसन्धान जारी रहेको जनाइएको छ।