काठमाडौं, भदौ २९ । एसीसी प्रिमियर कप २०२६ को उपाधि जित्दै एसिया कपमा स्थान पक्का गरेको नेपाली राष्ट्रिय क्रिकेट टोली स्वदेश फर्किएको छ।
मलेसियामा सम्पन्न प्रतियोगिताको फाइनलमा संयुक्त अरब इमिरेट्स (यूएई) लाई ४४ रनले पराजित गर्दै नेपालले दोस्रोपटक एसीसी प्रिमियर कपको उपाधि जितेको थियो। उपाधि जितेपछि नेपाली टोली सोमबार बिहान काठमाडौं आइपुगेको हो।
त्रिभुवन अन्तर्राष्ट्रिय विमानस्थलमा टोलीलाई नेपाल क्रिकेट संघ (क्यान) का सचिव पारस खड्का, उपाध्यक्ष रोशनकुमार सिंहसहित क्यानका पदाधिकारीले स्वागत गरेका थिए।
स्वागतका क्रममा क्यान सचिव खड्काले खेलाडीलाई उपाधिका लागि बधाई दिँदै आगामी अन्तर्राष्ट्रिय प्रतियोगितामा पनि उत्कृष्ट प्रदर्शनका लागि शुभकामना दिए।
प्रिमियर कपको उपाधिसँगै नेपालले आगामी वर्ष बंगलादेशमा आयोजना हुने एसिया कपका लागि पनि स्थान सुरक्षित गरेको छ। यससँगै नेपाली क्रिकेट टोलीले दोस्रोपटक एसिया कप खेल्ने अवसर पाएको छ।
यसअघि नेपालले सन् २०२३ मा पहिलोपटक एसिया कप खेलेको थियो। पछिल्लो सफलतासँगै नेपाली क्रिकेट टोलीले अन्तर्राष्ट्रिय मञ्चमा आफ्नो उपस्थितिलाई थप बलियो बनाएको छ।
