काठमाडौं, कात्तिक ६। दक्षिणपश्चिम चीनको तिब्बत क्षेत्रमा गएको ७ म्याग्निच्युडको शक्तिशाली भूकम्पमा परी कम्तीमा १६ जनाको मृत्यु भएको छ भने ३२ जना घाइते भएका छन्।
भूकम्पका कारण ३३९ भन्दा बढी घर भत्किएका छन् भने प्रभावित क्षेत्रमा उद्धार तथा राहत कार्य जारी रहेको छ।
प्राप्त विवरणअनुसार बिहीबार राति १० बजेर ३३ मिनेटमा सिजाङ स्वायत्त क्षेत्रअन्तर्गत नाग्छु सहरको बाकेन काउन्टी केन्द्रबिन्दु भएर भूकम्प गएको हो।
भूकम्पबाट ठूलो जनधनको क्षति भएको प्रारम्भिक विवरण सार्वजनिक भएको छ।
भूकम्पमा घाइते भएकामध्ये ११ जनाको अवस्था गम्भीर रहेको छ भने २१ जनालाई सामान्य चोटपटक लागेको जनाइएको छ। शुक्रबार बिहान २ बजेर २५ मिनेटसम्म संकलन गरिएको विवरणअनुसार भूकम्पले ३३९ भन्दा बढी घरमा क्षति पुर्याएको छ।
भूकम्पबाट प्रभावित क्षेत्रमा उद्धारकर्मी परिचालन गरिएको छ। विस्थापित नागरिकलाई सुरक्षित आश्रय उपलब्ध गराउन प्रहरी तथा अग्नि नियन्त्रण विभागका टोलीले अस्थायी पाल निर्माण गरिरहेका छन्। प्रभावित क्षेत्रमा उद्धार, राहत वितरण तथा क्षतिको विवरण संकलन गर्ने काम एकसाथ अघि बढाइएको अधिकारीहरूले जनाएका छन्।
चीनको सरकारी प्रसारण संस्था सीसीटीभीका अनुसार पछिल्लो भूकम्प उक्त क्षेत्रमा पाँच वर्षयताकै सबैभन्दा शक्तिशाली हो।
भूकम्पबाट भएको वास्तविक क्षतिको विस्तृत विवरण संकलन भइरहेकाले मृतक तथा घाइतेको संख्या र भौतिक क्षति थप बढ्न सक्ने सम्भावना रहेको छ।
प्रभावित नागरिकको उद्धार र राहतलाई प्राथमिकता दिँदै स्थानीय अधिकारीहरूले आवश्यक व्यवस्थापनको काम तीव्र बनाएका छन्।
