३ मंसिर,काठमाडौं
नेकपा एमालेको ११औँ महाधिवेशनअन्तर्गत सम्पन्न निर्वाचनको मतगणना जारी रहँदा नेतृत्व संरचनाको प्रारम्भिक तस्वीर प्रस्ट हुँदै गएको छ। पछिल्लो मतपरिणामअनुसार अध्यक्ष पदमा केपी शर्मा ओलीले प्रतिस्पर्धी ईश्वर पोखरेलमाथि उल्लेख्य अग्रता बनाएका छन्।
मतगणनामा ओलीले ४८९ मत प्राप्त गर्दा पोखरेलले १७७ मतमा सीमित भएका छन्। अध्यक्ष पदमा ओलीको अग्रता फराकिलो बन्दै जाँदा अन्य पदहरूमा भने मिश्रित र रोचक प्रतिस्पर्धा देखिएको छ।
सबैभन्दा चासोको केन्द्र बनेको महासचिव पदमा भने कडा प्रतिस्पर्धा कायम छ। ओली प्यानलबाट दोहोरिएका शंकर पोखरेलले ३६४ मत पाएका छन् भने ईश्वर पोखरेल पक्षका सुरेन्द्र प्रसाद पाण्डेले ३०२ मत ल्याएका छन्। मतान्तर धेरै नभएकाले महासचिव पदको अन्तिम परिणाम प्रतीक्षारत छ।
उपाध्यक्ष पदतर्फ बहुप्रतिस्पर्धा देखिएको छ। पृथ्वी सुब्बा गुरुङले ३५६ मतसहित अग्रस्थानमा रहँदा विष्णु प्रसाद पौडेलले ३४९ मत प्राप्त गरेका छन्। रामबहादुर थापा, गोकर्ण विष्ट, रघुजी पन्त र गुरू प्रसाद बरालबीच पनि उल्लेख्य प्रतिस्पर्धा देखिन्छ।
उपमहासचिव पदमा लेखराज भट्टले २९३ मतसहित अग्रता लिएका छन् भने रघुवीर महासेठ र योगेश भट्टराईबीच मतान्तर निकै कम देखिएको छ। सचिव पदमा भने धेरै उम्मेदवारबीच प्रतिस्पर्धा चर्किएको छ। महेश बस्नेत र छविलाल विश्वकर्माले समान ३११ मत प्राप्त गर्दै अग्रपंक्तिमा छन्।
मतगणना अझै जारी रहेकाले अन्तिम परिणामले नेतृत्व समीकरणमा थप परिवर्तन ल्याउन सक्ने सम्भावना कायमै छ। तर हालसम्मको मतपरिणामले एमालेको आगामी नेतृत्व संरचनामा ओली समूहको प्रभाव बलियो बन्दै गएको संकेत देखाएको छ।
