पर्सा, ११ फागुन २०८२ – जिल्ला प्रशासन कार्यालय पर्साले वीरगञ्ज महानगरपालिकाभित्र अनिश्चितकालीन कर्फ्यु लागू गरेको छ। यो कदम आइतबार साँझ युवा समूहबीच भएको झडपको पछिल्लो सुरक्षा स्थिति मूल्याङ्कन गरेर उठाइएको हो।
प्रमुख जिल्ला अधिकारी भोला दाहालका अनुसार, कर्फ्यु क्षेत्र पूर्वमा बाइपास रोड, पश्चिममा सिर्सिया नदी, उत्तरमा गण्डक चोक र दक्षिणमा शंकराचार्य गेटसम्म फैलिएको छ।
यस क्षेत्रमा नागरिकहरूको आवतजावत, भेला, जुलुस, प्रदर्शन, सभा, बैठक र घेराउजस्ता सबै गतिविधिमा रोक लगाइएको छ।
तर, केही विशेष सवारी साधन र व्यक्तिहरूलाई अनुमति दिइएको छ, जसमा अत्यावश्यक सेवाका गाडी, सञ्चारकर्मी, विश्वविद्यालय परीक्षाका परीक्षार्थी, परीक्षा केन्द्र कर्मचारी, पर्यटकसहितका गाडी, मानव अधिकार र कूटनीतिक नियोगका सवारी साधन समावेश छन्।
साथै, हवाई टिकटधारी यात्रुहरूको हवाई आवागमनमा पनि सुरक्षाकर्मीहरूले सहजीकरण गर्ने व्यवस्था मिलाइएको छ।
