काठमाडौं, चैत ११ —अमेरिकी राष्ट्रपति डोनाल्ड ट्रम्पले इरानसँग बढ्दो तनाव कम गर्न कूटनीतिक पहल अघि बढाएका छन्। उनले वार्ताको जिम्मेवारी उपराष्ट्रपति जेडी भान्स र विदेशमन्त्री मार्को रुबियोलाई दिएका हुन्।
पश्चिम एसियामा विकसित अवस्थाले अन्तर्राष्ट्रिय चासो बढिरहेका बेला अमेरिकाले संवादमार्फत समाधान खोज्ने संकेत गरेको छ। पछिल्ला घटनाक्रमले क्षेत्रीय सुरक्षा अवस्था थप संवेदनशील बनेको छ।
होर्मुज जलडमरूमध्य खुलाउने विषयमा अमेरिका र इरानबीच मतभेद कायमै छ। अमेरिकाले उक्त समुद्री मार्ग सञ्चालनमा ल्याउन दबाब दिँदै आएको भए पनि इरान आफ्नो अडानमा अडिग देखिएको छ।
यद्यपि, इरानी पक्षले दीर्घकालीन समाधानका प्रस्तावहरूबारे छलफल गर्न सकिने संकेत दिएको अन्तर्राष्ट्रिय सञ्चारमाध्यमहरूले उल्लेख गरेका छन्। यसले वार्ताबाट निकास निस्कने सम्भावना अझै खुला रहेको देखाउँछ।
