अमेरिकी उच्च अधिकारीको सिधा काठमाडौँ भ्रमण: नेपालप्रति वासिङ्गटनको नयाँ संके

काठमाडौँ — दक्षिण तथा मध्य एशिया मामिला हेर्ने अमेरिकी सहायक विदेशमन्त्री समीर पल कपुर निकट भविष्यमा नेपाल भ्रमणमा आउने भएका छन्। संयुक्त राज्य अमेरिका बाट सिधै काठमाडौँ आउने उनको यो भ्रमण पछिल्लो समय नेपालप्रति अमेरिकी चासो बढेको संकेतका रूपमा हेरिएको छ।
परराष्ट्र मन्त्रालय स्रोतका अनुसार कपुर सोमबार काठमाडौँ आइपुग्ने र बुधबार फर्किने कार्यतालिका तयार भइरहेको छ। उनी इस्तानबुल ट्रान्जिट हुँदै काठमाडौँ अवतरण गर्नेछन्। विशेष कुरा के छ भने, यो भ्रमण नेपालका लागि मात्रै केन्द्रित छ—अमेरिकी उच्च अधिकारीहरू प्रायः अन्य दक्षिण एशियाली देशको भ्रमणसँगै नेपाल आउने अभ्यासबाट यो फरक देखिन्छ।
नेपालमा रहँदा उनले प्रधानमन्त्री बालेन शाह नेतृत्वको सरकारका आर्थिक प्राथमिकताबारे अर्थमन्त्री डा. स्वर्णिम वाग्ले सँग छलफल गर्ने कार्यक्रम छ। साथै मिलेनियम च्यालेन्ज करपोरेसन (एमसीसी) अन्तर्गतको नेपाल कम्प्याक्ट कार्यान्वयनलाई गति दिने विषयमा पनि अमेरिकी चासो केन्द्रित रहने बताइएको छ।
कपुरलाई डोनाल्ड ट्रम्प प्रशासनले २०२५ अक्टोबरमा सहायक विदेशमन्त्रीमा नियुक्त गरेको हो। भारतको नयाँ दिल्लीमा जन्मिएका उनी दक्षिण एशियाली राजनीतिक र सुरक्षा मामिलामा अनुभवी मानिन्छन्। यसअघि उनी अमेरिकी सेनासँग आबद्ध नेभी पोस्ट ग्राजुएट स्कूल मा प्राध्यापकका रूपमा कार्यरत थिए।
नयाँ सरकार गठनपछि अमेरिकाबाट यति उच्चस्तरीय अधिकारीको सिधा काठमाडौँ भ्रमण हुनुले वासिङ्गटन डीसी ले नेपाललाई रणनीतिक प्राथमिकतामा राखेको संकेत दिएको कूटनीतिक वृत्तको बुझाइ छ।