प्रधानन्यायाधीश सिफारिसप्रति सुशीला कार्कीको असहमति, ‘परिणाम सरकारले भोग्छ’

काठमाडौं । पूर्वप्रधानन्यायाधीश सुशीला कार्कीले संवैधानिक परिषद्ले गरेको प्रधानन्यायाधीश सिफारिसप्रति असन्तुष्टि जनाउँदै यसको परिणाम सरकारले नै भोग्नुपर्ने चेतावनी दिएकी छन्।
बिहीबार गरिएको सिफारिसमा वरीयता सूचीमा चौथो स्थानमा रहेका न्यायाधीश डा. मनोज शर्मालाई अगाडि ल्याइएकोप्रति उनले आपत्ति जनाइन्। कार्कीले विधि, परम्परा र वरीयताको मर्मविपरीत निर्णय भएको भन्दै आलोचना गरिन्।
उनका अनुसार वरिष्ठतम न्यायाधीश सपना प्रधान मल्ल योग्य र सक्षम उम्मेदवार हुँदाहुँदै पनि उनलाई पछि पारिनु गम्भीर विषय हो। “यति योग्य र सक्षम महिला हुँदा उहाँमा के कमी देखियो?” भन्दै कार्कीले प्रश्न उठाइन्।
उनले न्यायपालिकामा नियुक्ति तथा पदोन्नति प्रक्रिया क्रमिक र योग्यता आधारित हुनुपर्ने बताइन्। अन्य राज्यका संस्थाजस्तै न्यायालयमा पनि वरीयता र अनुभवलाई सम्मान गर्नुपर्ने उनको धारणा थियो।
कार्कीले आफ्नो कार्यकालको अनुभव स्मरण गर्दै नेपालले महिला नेतृत्वको अवसर पाएको प्रसंग उल्लेख गरिन् र अहिलेको निर्णयले त्यस्तो सम्भावनालाई कमजोर बनाएको संकेत गरिन्।
उनले सपना प्रधान मल्लले महिला अधिकार तथा कानुन निर्माणमा महत्वपूर्ण योगदान दिएको उल्लेख गर्दै त्यस्तो पात्रलाई अवसरबाट वञ्चित गर्नु उचित नभएको बताइन्।
कार्कीले समग्र निर्णयप्रति असन्तुष्टि व्यक्त गर्दै न्यायपालिकाको गरिमा र संस्थागत प्रणालीलाई कमजोर पार्ने किसिमको निर्णय दीर्घकालमा प्रतिकूल हुन सक्ने चेतावनी दिएकी छन्।