शरणार्थी प्रकरणमा पूर्वगृहमन्त्री बालकृष्ण खाँड दोषी ठहर, सजाय पछि निर्धारण हुने

काठमाडौं, असार २३ — नक्कली भुटानी शरणार्थी प्रकरणमा काठमाडौं जिल्ला अदालतले पूर्वगृहमन्त्री बालकृष्ण खाँडलाई ठगी तथा संगठित अपराधमा मतियार रहेको ठहर गर्दै दोषी ठहर गरेको छ।
न्यायाधीश तेजबहादुर खड्काको इजलासले मंगलबार सुनाएको फैसलाअनुसार खाँडसहित २३ जना प्रतिवादी दोषी ठहर भएका छन्। यद्यपि उनीहरूलाई कति सजाय हुने भन्ने विषयमा भने अदालतले छुट्टै सुनुवाइमार्फत पछि निर्धारण गर्ने जनाएको छ।
अदालतको निर्णयअनुसार यस मुद्दामा आरोपित अन्य ७ जनाले भने सफाइ पाएका छन्।
बहुचर्चित नक्कली भुटानी शरणार्थी प्रकरणमा नेपाली नागरिकलाई अमेरिका पठाइदिने प्रलोभन देखाएर ठूलो रकम असुलिएको आरोपमा उच्च तहका राजनीतिक नेता, पूर्वप्रशासक, सुरक्षा अधिकारी तथा बिचौलियाविरुद्ध मुद्दा दायर गरिएको थियो।
मंगलबारको फैसलासँगै अदालतले पूर्वगृहमन्त्री खाँडलाई पनि उक्त आपराधिक योजनामा मतियारको भूमिका खेलेको निष्कर्ष निकालेको हो। अब अदालतले आगामी चरणमा दोषी ठहर भएका सबै प्रतिवादीको सजाय निर्धारण गर्नेछ।