गाजामा इजरायली आक्रमण, कम्तीमा २५ प्यालेस्टाइनीको मृत्यु

४ मंसिर, काठमाडौं।
गाजामा इजरायलले गरेका पछिल्ला हवाई तथा भौतिक आक्रमणमा कम्तीमा २५ जना प्यालेस्टाइनीको मृत्यु भएको हमास–नियन्त्रित स्वास्थ्य मन्त्रालयले जनाएको छ।

उद्धारकर्मीका अनुसार गाजा सहरको के–जेतुन क्षेत्रमा रहेको एक आवासीय भवनमा मात्रै एक महिला र एक बालिकासहित १० जनाको ज्यान गएको छ। अन्य स्थानबाट पनि हताहतीको संख्या निरन्तर बढिरहेको बताइएको छ।

इजरायली सेनाले भने ती आक्रमणहरू ‘हमासका आतंकवादी संरचना’ लक्षित रहेकाले आवश्यक ‘सुरक्षा कारबाही’ गरिएको दाबी गरेको छ। सेनाका अनुसार केही सशस्त्र समूहले दक्षिणी शहर खान युनिसमा तैनाथ सैनिकमाथि गोली प्रहार गर्दै पाँच हप्ता लामो युद्धविराम उल्लङ्घन गरेका थिए।

हमासले इजरायली दाबीबारे औपचारिक प्रतिक्रिया नदिएको बेला, हमासको सिभिल डिफेन्स एजेन्सीका प्रवक्ता महमुद बस्सलले बीबीसीसँग कुरा गर्दै गाजा सहर र खान युनिसका विभिन्न क्षेत्रमा इजरायलले लगातार आक्रमण गरिरहेको बताएका छन्। उनका अनुसार ‘धेरै दिनको शान्ति’ पछि एकैचोटि धेरै स्थानमा आक्रमण बढेको छ।

स्थिति फेरि तनावपूर्ण बन्दै जाँदा स्थानीय बासिन्दामा भय तथा असुरक्षाको भावना तीव्र बनेको अन्तर्राष्ट्रिय मिडियाहरूले उल्लेख गरेका छन्।