१२ माघ,आईसीसी महिला टी–२० विश्वकप ग्लोबल छनोट अन्तर्गतको खेलमा नेपालले बलिङतर्फ प्रभावशाली सुरुवात गरे पनि अन्तिम ओभरहरूमा दबाब कायम राख्न नसक्दा स्कटल्यान्डले प्रतिस्पर्धात्मक योगफल खडा गर्न सफल भएको छ।
टस हारेर पहिले ब्याटिङको निम्तो पाएको स्कटल्यान्ड २० ओभरमा अलआउट हुँदै १४० रनमा सीमित रह्यो। नेपालले पावरप्लेबाटै खेल आफ्नो पकडमा लिएको थियो। सुरुआती ६ ओभरमै ३ विकेट झार्दै नेपाली बलरहरूले स्कटल्यान्डलाई दबाबमा राखेका थिए। त्यसपछि पनि निरन्तर विकेट झार्दै नेपालले विपक्षीलाई ७९–६ को कठिन अवस्थामा पुर्याएको थियो।
तर, यहीँबाट स्कटल्यान्डले खेलमा पुनरागमन गर्यो। मध्यक्रम र तल्लो क्रमका ब्याटरले संयमित इनिङ खेल्दै टिमलाई उकासे।
स्कटल्यान्डका प्रमुख प्रदर्शन
प्रियानाज चटर्जी – अविजित ४५ रन
अलिसा लिस्टर – २२ रन
सराह ब्राइस – १८ रन
मेगान मेकल – १७ रन
नेपालको बलिङ चम्कियो
नेपालका बलरमध्ये मनीषा उपाध्याय सबैभन्दा सफल रहिन्। उनले ४ ओभरमा केवल १५ रन खर्चिएर ४ विकेट लिइन्।
रुबिना क्षेत्री ले पनि प्रभावशाली बलिङ गर्दै ४ ओभरमा २३ रन दिएर ३ विकेट हात पारिन्।
यसका साथै सीता राना मगर, रिया शर्मा र कविता जोशी ले समान १–१ विकेट लिए।
यद्यपि, डेथ ओभरमा रन रोक्न नसक्दा नेपालले राम्रो सुरुवातको पूर्ण फाइदा लिन सकेन।
नेपालले यस प्रतियोगितामा यसअघि थाइल्यान्ड र नेदरल्यान्ड्ससँग हार बेहोर्दा जिम्बाबेलाई पराजित गरेको थियो। यस नतिजापछि नेपाल २ अंकमै सीमित रह्यो।
सुपर सिक्स पुग्ने ६ टोलीको टुंगो
आजका खेलसँगै प्रतियोगिताको सुपर सिक्स चरणमा पुग्ने सबै ६ टोलीको टुंगो लागेको छ।
समूह ‘बी’ बाट:
स्कटल्यान्ड
नेदरल्यान्ड्स
थाइल्यान्ड
समूह ‘ए’ बाट:
बंगलादेश
आयरल्याण्ड
अमेरिका
पपुवा न्यु गिनीलाई ५ विकेटले हराएपछि अमेरिका पनि सुपर सिक्समा स्थान बनाउन सफल भयो।
सुपर सिक्स चरणबाट शीर्ष चार टोलीले आगामी जुन महिनामा इंग्ल्याण्डमा हुने महिला टी–२० विश्वकपमा स्थान बनाउनेछन्।
