काठमाडौँ, फागुन १४, २०८२-प्रतिनिधिसभा सदस्य निर्वाचनको मिति नजिकिँदै जाँदा स्वास्थ्य तथा जनसङ्ख्या मन्त्रालयले मतदान केन्द्र आसपास आकस्मिक स्वास्थ्य सहायता कक्ष स्थापना गर्ने तयारी गरेको जनाएको छ।
मन्त्रालयका अनुसार मतदानका दिन मतदाता, सुरक्षाकर्मी तथा कर्मचारीलाई तत्काल स्वास्थ्य सेवा उपलब्ध गराउन जिल्ला अस्पताल, प्राथमिक स्वास्थ्य केन्द्र र स्वास्थ्यचौकीलाई आवश्यक जनशक्ति तथा औषधि व्यवस्थापन गर्न निर्देशन दिइएको छ।
निर्वाचन अवधिभर २४ घण्टा आकस्मिक सेवा सञ्चालन गर्न अस्पतालहरूलाई तयारी अवस्थामा राखिएको मन्त्रालयले जनाएको छ। सम्भावित स्वास्थ्य आपतकालीन अवस्थालाई ध्यानमा राख्दै एम्बुलेन्स सेवा, प्राथमिक उपचार सामग्री तथा चिकित्सक टोली ‘स्ट्यान्डबाइ’ राख्ने व्यवस्था मिलाइएको छ।
मन्त्रालयले निर्वाचन आयोग तथा गृह मन्त्रालयसँग समन्वय गरी दुर्गम तथा हिमाली जिल्लामा अतिरिक्त स्वास्थ्य टोली परिचालन गर्ने योजना बनाएको जनाएको छ। विशेषगरी चिसो मौसम, लामो पैदल दूरी र भीडभाडका कारण स्वास्थ्य समस्या हुन सक्ने भएकाले सावधानी अपनाइएको मन्त्रालयका अधिकारीले बताए।
निर्वाचनलाई सुरक्षित र व्यवस्थित रूपमा सम्पन्न गर्न आवश्यक स्वास्थ्य सेवा उपलब्ध गराउने तयारी अन्तिम चरणमा पुगेको मन्त्रालयले जनाएको छ।
