चैत ४, २०८२, काठमाडौं-राष्ट्रिय स्वतन्त्र पार्टी (रास्वपा)ले अनुशासनमा नबस्ने र जनअपेक्षाविपरीत काम गर्ने आफ्ना सांसदलाई फिर्ता बोलाउने (‘राइट टु रिकल’) चेतावनी दिएको छ।
दुई दिने ‘क्लोज क्याम्प’ अभिमुखीकरण कार्यक्रममार्फत पार्टीले नवनिर्वाचित सांसदलाई संसदीय भूमिका, आचरण र जिम्मेवारीबारे प्रशिक्षण दिएको हो। कार्यक्रममा प्रत्यक्ष र समानुपातिकतर्फ निर्वाचित अधिकांश सांसद सहभागी भएका थिए।
अभिमुखीकरणमा सांसदलाई संसदमा कसरी बोल्ने, कसरी प्रस्तुत हुने, के गर्ने र के नगर्ने भन्नेबारे प्रशिक्षण दिइएको थियो। सहभागी सांसदहरूले कार्यक्रमलाई फलदायी र उपयोगी भएको बताएका छन्।
रास्वपा सभापति रवि लामिछानेले सांसदलाई स्वतन्त्रता र अनुशासनबीच सन्तुलन कायम गर्न आग्रह गर्दै अनुशासनहीनता सह्य नहुने स्पष्ट पारे। उनले जनताले दिएको जिम्मेवारीअनुसार काम नगरे कडा कारबाही हुने चेतावनी दिए।
लामिछानेले सांसदहरूलाई स्वार्थ समूहसँग नजिक नहुन, बिचौलियाबाट टाढा रहन र गुटबन्दी नगर्न निर्देशन दिए। साथै मन्त्री बन्नका लागि लबिङ नगर्न र आफ्नो क्षेत्रमा मात्रै बजेट केन्द्रित नगर्न पनि सचेत गराए।
उनले सांसदको मुख्य काम कानुन निर्माण भएको उल्लेख गर्दै जनताको समस्या समाधान गर्ने गरी कानुन बनाउन ध्यान दिन आग्रह गरे। ‘जनताको घरसम्म सेवा पुर्याउने बाटो कानुनमार्फत खुल्छ,’ उनले भने।
कार्यक्रममा सहभागी सांसदहरूले संसदीय अभ्यास, बजेट प्रक्रिया र राज्य सञ्चालनका विषयमा नयाँ अनुभव हासिल गरेको बताएका छन्। विभिन्न पृष्ठभूमिबाट आएका सांसदहरूबीच आपसी चिनजान र समन्वय पनि भएको उनीहरूको भनाइ छ।
पार्टीले विधानमा रहेको ‘राइट टु रिकल’ व्यवस्था कडाइका साथ लागू गर्ने बताउँदै अनुशासनमा नबस्ने सांसदलाई कारबाही गर्ने संकेत दिएको छ।
